İşğal etilgen Qırımda Rusiye mahkemesi tarafından mahküm etilgen ve Rusiyeniñ Tver vilâyetindeki koloniyada tutulğan Volodımır Baluh kene açlıq ilân etti. Bu aqta Rusiye Apostol pravoslav kilsesiniñ yepiskopı, Sankt-Peterburg Aq qorçalayıcı şurasınıñ azası Grigoriy Mihnov-Vaytenko iyünniñ 27-nde Qırım.Aqiqatqa bildirdi.
Onıñ aytqanına köre, Volodımır Baluh onıñ menfaatlarını temsil etmege başlağan advokat Daniil Berman ile körüşip, iyünniñ 25-nde açlıq ilân etkenini bildirdi.
Grigoriy Mihnov-Vaytenkonıñ Qırım.Aqiqatqa bildirgenine köre, Volodımır Baluh kameradaki suvuqnı şikâyet ete, anda 17 derece ola.
Baluh oña qalın urba berilmey, vitaminler ve «Psaltır» alındı, dep ayttı. Mihnov-Vaytenkonıñ aytqanına köre, Baluh onı koloniyada ziyaret etecek olğan Ukraina konsulı kirsetilmegenini ögrendi, çünki koloniya Baluhnıñ Ukraina vatandaşlığını tanımay.
Onıñ aytqanına köre, başta Volodımır Baluh «quru» açlıq tutacaq oldı, lâkin advokat iyünniñ 26-nda olğan körüşüvde eñ azından «sıñırlı suv» içmege qandırdı.
Qırım.Aqiqat ukrainalı faalniñ açlığına dair tafsilâtlı malümat almaq içün Volodımır Baluhnıñ advokatı ile bağlanmağa tırışa.
Baluhnıñ açlığı aqqında malümat cumaaqşamı künü Rusiye kütleviy haber vastaları tarafından da derc etildi.
Bir qaç kün evelsi ukrainalı faal Volodımır Baluh Tver vilâyetiniñ koloniyasındaki ceza izolâtorına qapatıldı. Daa evel Baluhnı ceza izolâtorına avuştırğanda anda o, aman-aman eki ay bulundı. Soñra onı apishane hastahanesine avuştırğan ediler.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
