Rostov-na-Donu şeeriniñ Şimaliy Kavkaz bölge arbiy mahkemesi, “Hizb ut-Tahrir davası”nıñ birinci Bağçasaray taqımınıñ iştirakçilerine mahkeme qararını ilân etti.
Enver Mamutovğa şiddetli rejim koloniyasında 17 yıllıq apis cezası mahküm etildi, Ruslan Abiltarov, Remzi Memetov ve Zevri Abseitovğa -şiddetli rejim koloniyasında 9 yıllıq apis cezası mahküm etildi, dep bildire “Qırım birdemligi” cemiyet birleşmesi.
“Musulmanlar terrorcı degil”: Qırımda mahküm etilgen qırımtatarlarğa qoltutuv fleşmobnı ötkereler (süret toplamı)
Rusiye jurnalisti Anton Naumlük, mahkeme qararında belgilengen serbestlik sıñırlavı esas apis müddetiniñ bitkeninden soñ ükümsürip başlağanını añlattı. O apiste bulunmaqnen bağlı olmağan sıñırlavlar. Mahküm etilgenlerge yaşağan yerini deñiştirmege, onı beligilengen saatlarda terk etmege, kütleviy tedbirleni ziyaret etmege ve olarda iştirak etmege yasaqlana.
Advokatlar mahkeme qararına itiraz etmege istegenlerini bildirdi.
Dekabrniñ 21-nde Zevri Abseitov, Remzi Memetov, Rustem Abiltarov ve Enver Mamutov mahkemede soñki sözüni ayttı. İç birisi qabaatını tanımay. Olar davanıñ «siyasiy sebeplerini» qayd etti.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
