Qırımdaki Rusiye uquq qoruyıcı organlarınıñ hadimleri Canköy rayonınıñ daa dört sakinine «ekstremist faaliyeti qabul etilmeycegine» dair tenbi vesiqalarını berdi. Bu aqta «Qırım birdemligi» haber ete.
Vatandaş jurnalisti Server Ayar, faaller Osman Asanov, Smail Saitov ve Usein Asanov tenbilendi – episi Canköy rayonınıñ Bay Könçek köyünde yaşay.
«Qırımtatar Milliy Meclisi» ekstremist teşkilâtınıñ azaları 03.05.2020, 18.05.2020 ve 26.06.2020 tarihlerinde qanunsız aktsiyalarını keçire bile», – dep haber etile Rusiye politsiyasınıñ vesiqasında.
Qayd etilgenine köre, Server Ayar vesiqanı imzalamağa razı olmadı. Tenbi vesiqası berilgende hadim cep telefonına çıqardı. Jurnalistni tenbiledi: «Qanunnı bozsañız, mesüliyetke çekileceksiñiz».
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Aktsiya mayısnıñ 3-nde kemirilecek edi.
Çubarov, «Qırım yürüşi» arfesinde Kreml qırımtatarlarnı qorquzmağa tırışacaq, dep inkâr etmey.
Martnıñ 31-nde berilgen malümatqa köre, koronavirus sebebinden aktsiya başqa vaqıtqa qaldırıldı.
Rusiye Tış işler nazirligi Qırımtatar Milliy Meclisi ilân etken «Qırım yürüşini» «provokatsiya» dep adlandırdı.
