Dünya sağlıq teşkilâtı Qıtaydan tarqalğan koronavirusnı dünya miqyasındaki fevqulâde vaziyet dep ilân etti, dep haber ete Azatlıq Radiosı.
Dünya sağlıq teşkilâtınıñ baş müdiri Tedros Adganom Gebreyesusnıñ aytqanına köre, Qıtay tışında 18 memlekette 98 koronavirus hastası qayd etildi. Aynı vaqıtta, Qıtaydan ğayrı, koronavirustan ölgenler aqqında malümat yoq.
Yanvarniñ 30-nda saba virusqa oğrağan 170 insannıñ ölüm aqqında malümat tasdıqlandı.
Yaqında qayd etilgen virus büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
Daa evel Moğolistan ve Qırğızistan Qıtay sıñırını qapattı, dep bildirdi. Özbekistan, Qazahistan ve Turkmenistan sıñırdaki kontrolni quvetleştirdi. Rusiye işğal etken Qırım ve Aqyarda koronavirus telükesi tarqalğanı içün tevsiyeler çıqarıldı.
