Dünya sağlıq teşkilâtı, Avropada koronavirus tarqaluvınıñ eñ yüksek seviyesine yaqınlaşqanınıñ alâmetleri bar, dep bildire. Bu aqta Bloomberg agentligi haber ete.
Qayd etilgenine köre, Avropanıñ hasta sayısına köre eñ buhranlı memleketi olğan İtaliyada soñki eki afta içinde eñ az yañı adise qayd etildi.
Dünya sağlıq teşkilâtındaki sağlıq saasınıñ fevqulâde vaziyetler bölüginiñ yolbaşçısı Mayk Rayannıñ bazarertesi künü bildirgenine köre, hastalıqnıñ eñ yüksek seviyesine İtaliya ve İspaniya yaqınlaşa, amma bu eki afta evelsi hastalanğanlar olacaq.
Martnıñ 31-ne qadar dünyada 826 biñ koronavirus hastası qayd etildi. 40 biñden çoq insan vefat etti, 174 biñ tüzeldi.
Ukraina laboratoriyalarında 645 COVID-19 koronavirus hastası qayd etildi (vaqtınca işğal etilgen topraqlardaki adiseler sayılmay).
Martnıñ 31-nde saba Rusiye kontrolindeki Qırım yolbaşçısı Sergey Aksenov koronavirus yuqunçına oğrağan ekinci yerli insan tasdıqlandı, dep bildirdi. Böylece, Qırımda 16 kişi qayd etildi. Olardan 14-ü kelgenlerde, ekisi – yerli. Aqyarda 5 kişi koronavirusnen hastalandı.
Aqyar sakinleriniñ aprelniñ 1-nden itibaren acele bir şey olmasa, evden çıqmaları yasaq etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
