Rusiye kontrolindeki Qırım sağlıq naziri Aleksandr Ostapenkonıñ bildirgenine köre, 64 koronavirus hastası ağır alda buluna.
Bu aqta o, noyabrniñ 11-nde yuqunç tarqaluvı ile küreş operativ ştabınıñ toplaşuvında ayttı.
«Bugünki künde 3938 insan tedaviylene. Tedaviylenmege devam etken hastalardan 64-ü ağır alda buluna. Umumen 30 hasta aqcigerlerni suniy avalandıruv cihazına bağlı, 6-sı invaziv suniy avalandıruvda, 34-ü oksigen yardımını ala», – dep bildirdi Ostapenko.
Keçken künü Qırımda daa üç hasta koronavirustan vefat etti, pandemiya vaqtında, Qırım akimiyetiniñ malümatına köre, 188 insan vefat etti.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayayarımadada koronavirus yuqunçından vefat etkenlerniñ sayısı arta, dep qayd ete. Soñki eki aftada 49 vefat qayd etildi, 28-i soñki aftada.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
