Link açıqlığı

Saatnıñ esas haberi

Koronavirus Qırımda: akimiyet vefat etkenlerniñ sayısı arta, dep qayd ete


Qırım ve Aqyardaki Rospotrebnadzor idaresiniñ yolbaşçısı Natalya Penkovskaya yarımadada koronavirus yuqunçından vefat etkenlerniñ sayısı arta, dep qayd ete.

Bu aqta o, noyabrniñ 11-nde bu yuqunç ile küreş operativ ştabınıñ toplaşuvında bildirdi.

«Ne yazıq ki, vefatlar meselesinde ne stabilleşüv, ne de vaziyetniñ eyilişmesi yoq. Vefat sayısı arta. Soñki eki aftada 49 vefat qayd etildi, 28-i soñki aftada. 50-64 yaşlarında vefat etkenlerniñ sayısı arta», – dedi Penkovskaya.

Bundan evel bildirgenine köre, Qırımda al-azırda COVID-19 hastalarınıñ sayısı artmay.

Keçken künü 207 koronavirus hastası qayd etildi. 7129 insan tüzeldi. Bir kün evelsi berilgen malümatqa köre, Qırımda bir künde 15 insan koronavirustan vefat etti.

Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG