Qırımda soñki üç aftada COVID-19 hastaları yatqan hastahane yataqlarınıñ sayısı üç qat eksildi. Bu aqta Qırım ve Aqyardaki Rospotrebnadzor idaresiniñ yolbaşçısı Natalya Penkovskaya oktâbrniñ 21-nde yañı koronavirus yuqunçı ile küreş operativ ştabınıñ toplaşuvında ayttı.
«Keçken afta Rospotrebnadzor sistemasınıñ Qırımnıñ veba ile küreş stantsiyasınıñ mütehassısları kovid hastaları içün qoşma yataq açmaq içün Yedi Quyu rayon hastahanesini tedqiq etti. Bir sıra teklif bar ve anda qoşma yataqlar yapıla bile», – dedi Penkovskaya.
Avgust ayında «№2 Aqmescit klinik loqsahanesinde» COVID-19 hastaları içün yuqunç hastahanesi açıldı.
Qırımda keçken künü 203 koronavirus hastası qayd etildi. Umumen Qırımda, yerli akimiyetniñ malümatına köre, 7200 insan koronavirusqa oğradı, 113 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
