Qırımda keçken künü eki hasta koronavirus yuqunçından vefat etti. Bu aqta Rusiye kontrolindeki Qırım sağlıq nazirliginiñ statistik malümatında aytıla.
Müessise malümatına köre, Qırımda koronavirustan vefat etkenlerniñ sayısı 56 oldı. Qırım akimiyeti COVID-19-dan vefat etkenler aqqında daa tafsilâtlı bir malümat bermey.
«2534 insan tibbiy közetüv altında buluna, 478-i evde dinamik közetüv altında buluna, 1954 kişi hastahanelerde qala, 102 insan observatorlarğa izolâtsiya etildi», – dep aytıla nazirlikniñ haberinde.
Keçken künü Qırımda 81 yañı koronavirus hastası qayd etildi, dep bildirdi Qırımnıñ Rusiye yolbaşçısı Sergey Aksenov. Umumen Qırımda, yerli akimiyet malümatına köre, 4053 yañı koronavirus hastası qayd etildi, 2561 insan tüzeldi.
Rospotrebnadzor, Qırımda koronavirus hastalarınıñ sayısı arta, dep qayd etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
