Keçken künü Qırımda 81 yañı koronavirus hastası qayd etildi.
«29-ı tibbiy yardım içün muracaat etkende qayd etildi, 34-ü daa evel qayd etilgen hastalarnen alâqada oldı, 17-si sağlam insanlarnıñ skriningi neticesinde qayd etildi, 1 kişi Ukrainadan keldi», – dep aytıla Qırımnıñ Rusiye yolbaşçısı Sergey Aksenovnıñ Facebook haberinde.
Umumen Qırımda, yerli akimiyet malümatına köre, 4053 yañı koronavirus hastası qayd etildi, 97-si çetelden keldi, 124-ü qomşu Rusiyeden kelgenler ve olarnen alâqada olğanlar, 3156 hasta tibbiy yardım içün muracaat etkende ve laboratoriyada tasdıqlanğan hastalarnen alâqada olğanı içün qayd etildi, 676-sı sağlam insanlarnıñ laborator skriningi neticesinde belli oldı. 2561 insan tüzeldi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
