Kaliforniâdan olğan tetqiqatçılar COVID-19 ile hastalanıp tüzelgen, amma yuqunç dep diagnoz qoyulğan soñ ilk 10 kün devamında hastahanege yatqızma ihtiyacı olmağan 1407 hastanıñ hastalıq tarihını talil ettiler. Araştırmanıñ neceleri ne? Bu aqta Azatlıq Radiosı ve «Amerkia Sesi» yazalar.
Nefes tarlığı, köküs ağrısı, öksürik, qursaq ağrısı ve yürek qarışuvı ‒ soruştırılğanlarnıñ 27 faizi yuqunçqa oğrağandan 60 künsoñra da bu ve başqa alâmetlerge şikâyet etti, dep MedRxiv saytında yayınlanğan ilk neticelerde haber etile.
Uzun müddetli meseleler bütün yaş gruppalarında peyda olğan, dep qayd ettiler tetqiqatçılar.
«Hastalıq tarihı tetqiq etilgen 34 baladan 11-i uzun müddetli alâmetlernen qarşılaştılar», ‒ The New York Time araştırmanıñ müelliflerinden biri Melissa Pintonıñ sözlerinden alıntı ketire.
Hastalıq tarihı tetqiq etilgen 34 baladan 11-i uzun müddetli alâmetlernen qarşılaştılarMelissa Pinto
Uzun müddetli koronavirus alâmetleri cemaat sağlığınıñ müim amilidir, bunı idare ve diagnostika etecek qaideler ise yoq, dep qayd ettiler tetqiqatçılar.
Olar bu mevzunı terence tetqiq etmege tevsiye eteler: COVID-19 ile hastalanıp tüzelgen ve devamlı alâmetlernen çekişkelerge koronavirusnıñ bedeniy, zihniyet ve duyğu tesirini qoşusça tetqiq etmek kerek.
Ne yapmaq?
Molekulâr biologiya ve genetika Ukraina institutı, ağır koronavirus pnevmoniyasını kevde üceyreleri ile tedaviylenilmesine dair ilk klinik tetqiqlernin musbet neticeleri aqqında bildirdiler.
Tetqiqatta eki taraflı pnevponiyağa oğrağan, saturatsiya 93 faizden aşağı olğan 13 hasta iştirak etti (36 yaştan 73 yaşqa qadar erkekler).
İnstitutta qayd etkenlerine köre, kevde üceyreleri kirsetilgen soñ, ekinci afta 13 hastadan dörtüniñ aqcigeri özüne keldi.
«Yigirmi dörtünci aftada KT neticelerine köre hastalarnıñ aqcigeri yavaş-yavan yahşı olğanı körüne, tek bir hastada fibrolleşme alâmetleri peyda oldı», ‒ dep yazıla bildirmede.
Üceyre terapiyasını almağan 15 kişiden ibaret olğan kontrol gruppada bir hasta öldi, yedisinde sekizinci aftada aqcigerinde fibrolleşme peyda olıp başladı.
Martnıñ 8-nde Ukrainada 3261 yañı koronavirus hastası qayd etildi, olarnıñ arasında 160 bala ve 54 tibbiyet hadmi. Bunı Ukraian Sağlıq saqlav naziri Maksim Stepanov haber etti.
Tünevin 1837 adam hastahanege yatqızıldı, 975 tedaviylendi ve 76 öldi.
Kün devamında Ukrainada 18 207 test yapıldı.
Soñki kün içinde eñ çoq hasta Vinnitsa (460), İvano-Frankifsk (433), Çernivtsi (409), Lviv vilâyetlerinde(351) ve Kyiv şeerinde (201) qayd etildi.
Pandemiya başlağanından Ukraina qıtasında 1410061 adam COVID-19-ğa oğraвı, 27204 öldi.
MALÜMATNAME: Qırımda keçken künü 60 yañı koronavirus hastası qayd etildi, aynı zamanda 1-niñ hastalıq alâmetleri yoq edi, beş hasta öldi, pandemiya başlanğandan berli ise 979, dep haber etti Qırımnıñ Rusiye başı Sergey Aksönov.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
