Ağustos 25 sabasında Rusiye telükesizlik hadimleri apayı ve üç balasınen Ukrainanıñ qıtadaki qısmına qaytqan Kyiv sakini qırımtatar Server Devletşayevni Qırımdan çıqarken yaqaladılar.
Qırımtatar Milliy Meclisiniñ reisi Refat Çubarovnıñ bildirgenine köre, yaqalanğannıñ bulunğan yeri belli degil.
Onıñ malümatına köre, Devletşayevler ailesi «Armânsk» keçirüv noqtasına saba saat 7-de keldi.
Çubarov Facebookta: «Sıñırcılar şahsiy vesiqalarını közden keçirgen soñ FSBciler aileniñ başlığı Serverni alıp ketti, apayı Dilârağa ise, balalarınen beraber Qırımğa kete bilecegini ayttılar. Onıñ, aqaysız nasıl kete bilecegi aqqında sualine, onıñ eñ azından üylege qadar olarda «qalacağını» añlattılar», – dep yazdı.
Çubarov, ağustos 25 saat 23-teki vaziyetke köre, Dilâra Devletşayeva kiçkene balalarınen beraber Ukrainanıñ qıtadaki qısmında buluna, dep ilâve etti.
Meclisniñ reisi, Server Devletşayevni yarımadanıñ iç qısmına alıp ketilgenini ihtimallı dep saya.
O, Devletşayevniñ, apayı Dilâra, oğlu Omer (6 yaşında) ve qızları Safiye (9 yaşında) ve Anife (3 yaşında) ile beraber musulmanlarnıñ Qurban Bayramı arfesinde ana-babasını ve soy-aqrabalarını ziyaret etmek maqsadınen ağustos 19-da Qırımğa kelgenini añlattı.
«Qırım birdemligi» cemiyet teşkilâtıniñ faaliyetçileri, yaqalanğannıñ ana-babası oğullarını faal surette qıdırıp başladılar, dep bildireler. Olarnıñ malümatına köre, Server Devletşayevniñ babası, poliske insannıñ ğayıp olması aqqında arizanı yaza.
Ondan ğayrı, faaliyetçiler, Qırımnıñ Ukrainanıñ qıtadaki qısmı ile memuriy sıñırında bulunğan daa bir keçirüv noqtasında «qırımtatar İslâm Karaşayev yaqalandı ve uzun vaqıt tutula», dep bildireler.
Rusiye telükesizlik hadimleri bu malümatnı şimdilik izalamayalar. Qırım.Aqiqat olıp keçken adiselerniñ tafsilâtlarını ögrene.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».
