Qırımtatar Milliy Meclisiniñ reisi Refat Çubarov PACEniñ Rusiye işğal etken Qırımda insan aqlarına dair qararı «aqlı» şekilde qabul etildi, dep bildirdi. Bu aqta o, Qırım.Aqiqat Radiosınıñ yayınında ayttı.
«Rusiye begenmegen qararlarını yerine ketirmeycegini daa bir kere köstere. Amma qarar qabul etilüviniñ sebepleri bar, er bir tola arqasında Rusiye olacaq divarnı qura», – dep tüşüne Çubarov.
Onıñ aytqanına köre, Rusiye «tek sanktsiyalar tilinden añlay».
«Toplaşuv yayınını diñledim ve Rusiye eyyetiniñ qararnı muzakere etmege istemeyip, propaganda şiarlarını seslendirgeni köründi. Şunıñ içün assambleyada iştirak etken diplomatlar başqa türlü areket etecegini beklemege kerekmey. Rusiye vekilleri tek sanktsiyalar tilinden añlay», – dedi o
Hatırlatamız, Rusiye Devlet dumasınıñ halqara işler komitetiniñ reisi Leonid Slutskiy Rusiye PACEniñ işğal etilgen Qırımda qırımtatarlarnıñ aqları bozulğanına dair qararını yerine ketirmeycek, dep bildirdi.
Rusiye Devlet dumasınıñ spikeri Vâçeslav Volodin Rusiye PACEde taqdim etilgen işğal etilgen Qırımda qırımtatarlarnıñ aqları bozulğanına dair maruza müellifi – İslandiya vekili Sunna Evarsdottirniñ memleketke kiriş yasağı meselesini kötere bile, dep bildirdi.
Hatırlatamız, Avropa Şurası Parlament assambleyası iyünniñ 23-nde aqşam Rusiye işğal etken Qırımda qırımtatarlarnıñ aqları aqqında qararnı qabul etti. Daa evel berilgen malümatqa köre, PACE musaviylik ve ayırımsızlıq meseleleri komiteti yarımadada qırımtatarlarnıñ aqlarını qoruv rezolütsiyasına teklif etilgen Ukraina tüzetüvleriniñ ekseriyetini qabul etti.
Ukraina eyyeti Avropa Şurası insan aqları komissarı Dunâ Miyatoviç ile baarde körüşip, Qırımda insan aqları vaziyeti, insanlarnıñ ğayıp oluvı ve qanunsız apis cezaları, qırımtatarlarnıñ aqlarını qoruv meseleleri ve Rusiyeniñ Qırımtatar Milliy Meclisini «terror teşkilâtı» olaraq tanıma qararınıñ lâğu etilüvi aqqında laf etken edi.
