Mayısnıñ 25-nde Ukraina Tış işler naziriniñ birinci muavini, UNESCO meselelerinden Ukraina Milliy komissiyasınıñ reisi Emine Ceppar UNESCO meselelerinden Kanada Milliy komissiyasınıñ reisi Liyett Vasser ile işğal etilgen Qırımdaki medeniyet abidelerine qarşı Rusiye akimiyetiniñ cinayetlerini muzakere etti.
«Ukraina Milliy komissiyasınıñ reisi vaqtınca işğal etilgen Qırımdaki vaziyet aqqında aytıp berdi, şu cümleden Rusiye işğal memuriyetiniñ medeniy abidelerini yoq etmek içün yapılğan arekteleri aqqında», – dep haber ete TİN matbuat hızmeti.
Emine Ceppar Liyett Vasserge, Ukrainanıñ UNESCO salâhiyetleri sıñırında işğal etilgen Qırımdaki vaziyetniñ monitoringi meselesini UNESCO-nıñ kün tertibinde saqlamaq içün Kanada tarafınıñ destegine köre minnetdarlıq bildirdi.
«Kanada tarafı em Qırımda, em Ukrainanıñ şarqında vaqıtnca işğal etilgen topraqlarda insan aqlarınıñ bozulmasına qarşı küreşte Ukraina ile birdemlik bildirdi», – dep qoştılar nazirlikte.
Ukraina TİN-de qayd etkenleri kibi, «taraflar UNESCO-nıñ ortaq mektep ve kafedraları arasında qarşılıqlı terenleştirme meselesini, eki memleketniñ milliy komissiyalarınıñ faaliyetiniñ aktual meseleleriniñ onylan muzakerelerini teşkil etmesini, qarşılıqlı tecribeden faydalanıp ve büyük ekspert daireleriniñ celp etilmesi ile milliy komissiyalar içün strategiyalarnı azırlama meselesini al etmege añlaştılar».
Ливадийский дворец: «полная реставрация» царского наследия (фотогалерея)
Qırım işğalinden soñ Rusiye Qırımda medeniy ve tarihiy emiyeti olğan bütün obyektlerni öz yurisdiktsiyası altına aldı. Kyiv, olar Ukraina halqına ait olğanını israr etip, mezkür obyektlerni UNESCO imayesi altına almağa rica ete.
2019 senesi sentâbr ayında UNESCO baş müdiri Audrey Azoulaynıñ maruzası aydınlatılğan edi, anda yarımadada vaziyet kerginleşe, dep qayd etile.
Qırımnıñ Rusiye akimiyeti UNESCO maruzalarında berilgen malümatnen razı degil. Qırımnıñ Rusiye medeniyet naziri Arina Novoselskaya UNESCO vekillerini yarımadağa davet etip, medeniy ve tarihiy obyektlerniñ vaziyetine «tarafsız qıymet kesmege» teklif etken edi.
UNESCO Dünya mirası cedveline işğal altındaki Qırımnıñ «Tavrik Hersones» qoruğı kirmekte. Cedvelge kirsetilecek namzetler arasında Bağçasaraydaki Hanlar sarayı, Sudaqtaki Ceneviz qalesi, Qırım astrofizik observatoriyası, Manğup Qale, Eski Kermen ve Çufut Qale bar.
