Ukraina informatsion siyaseti naziriniñ birinci muavini Emine Ceppar ilhaq etilgen Qırımda qırımtatar aq qorçalayıcısı Lutfiye Zudiyeva tutulğanını «eñ telâşlı işaret» dep adlandırdı.
Bu aqta Ceppar Facebook saifesinde yazdı.
«Lutfiyeniñ tutıp alınması – eñ telâşlı işarettir. Aq qorçalayıcı qadınğa qarşı ilk sefer böyle bir şey yapıla. Cezalandırıcı «sistemanıñ» nevbetteki areketleri ne olacağını tahmin etmege qorqam. Şimdi bunı ne qadar çoq insan bilse, o qadar yahşı», – dep qayd etti nazir muavini.
Qırımtatar asıllı ukrainalı jurnalist Osman Paşayev Facebook saifesinde Zudiyevanı «işğal altındaki yarımadada serbest Qırımnıñ közü ve yüregi» dep adlandırdı.
«Lutfiye 5 yıldan berli künde 24 saat devamında bağda qala. Lutfiye Aqmescitteki «mahkemeler» vaqtında ve ukrainalı arbiyler zapt etilgen soñ ilk künlerde 24 deñizciniñ advokatları ve jurnalistleri arasında bağnı temin etti», – dep yazdı Paşayev.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı.
Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.
Al-azırda Qırım ve qomşu Rusiyeniñ müessiseleri bir de bir izaat bermediler.
