Qomşu Rusiyeniñ Qırım işğali «Rusiyeniñ regiondaki maqsadları içün bir deñev poligonı ola», çünki onı em Suriyede, em Libiyada körmek mümkün. Bu aqta Ukraina Tış işler naziriniñ birinci muavini Emine Ceppar Daily Sabah intervyüsında ayttı.
Onıñ qayd etkenine köre, Qırım «Ukraina topraq bütünligi ğayrıdan tiklengenine qadar halqara toplulıqnıñ kün tertibinde qalmalı».
«Rusiye – Ukrainağa qarşı cinayet yapqan devlet, işğalden mesüliyetli olğan memleket ve Qırımnı işğalden azat etecek memleket ola, dep tüşünemiz», – dep qayd etti Ceppar.
Rusiyeniñ Qırım platformasında iştirak etüv ihtimalinen bağlı sualge diplomat bu memleketke resmiy davet yollanılacaq, amma onı qabul etecek, dep beklemeyler, dep ayttı.
«Ebet, bugün Rusiyeniñ kerçek yüzünen bağlı bir hayalımız yoq, ve, ne yazıq ki, Rusiyeniñ şimdiki akimiyeti medeniy bir baqış köstermegen ve insanlıqqa qarşı cinayet yapqan bir akimiyet olğanını aytmağa mecburmız», – dedi o.
Daa evel qırımlı deputat Türkiyeniñ yarımadanı işğalden qurtaruv platformasına qol tutmaq niyetini tenqit etti: «Türkiye, aslında Qırımğa qarşı bir ittifaq olğan, qırımlılarğa qarşı duşmanlıq yapqan Kyivniñ «Qırım platforması» degen leyhasına qoşulsa, ciddiy bir strategik hata yapar», – dedi Qırımnıñ Rusiye parlamentiniñ halq diplomatiyası ve milletlerara munasebetler komitetiniñ yolbaşçısı Yuriy Gempel «RİA Novosti» neşirine.
Onıñ aytqanına köre, Türkiye «Rusiye kibi sadıq bir ittifaqdaşını ve Rusiye turistlerini coya bile».
Türkiye prezidenti Recep Tayyip Erdoğan, memleket Yarımadanı işğalden qurtaruv Qırım platforması çerçivesinde Ukraina ile işbirligi yapmağa azır, dep bildirdi. Kyiv ve Ankara Qırımda insan aqlarını qorçalav ve «qanunsız tutulğan Ukraina vatandaşlarını» azat ettirüv meselelerinde ğayretlerini birleştirmege devam etmek niyetleri bar olğanını tasdıqladılar.
Ukraina prezidenti Volodımır Zelenskıy Demirören türk haber agentligine intervyü berip, Qırımtatar Milliy Meclisi ve Türkiye Qırımnı işğalden qurtaruv platformasınıñ işinde iştirak eterler dep ümüt etkenini bildirdi.
Meclis reisi Refat Çubarov Qırım.Aqiqatqa izaat berip, qırımtatarlarnıñ temsiliy organı yarımadanı işğalden qurtaruv platformasında iştirak etmege azır, dep bildirdi.
Qırımnı işğalden qurtaruv halqara meydançığı – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiyeniñ onı halqara muzakerelerde kötermege niyeti yoq, dep qayd etken edi.
