Ukraina prezidenti Volodımır Zelenskıy Qırımtatar Milliy Meclisi ve Türkiye Qırımnı işğalden qurtaruv platformasınıñ işinde iştirak eterler, dep ümüt ete. Bu aqta o, Demirören türk haber agentligine ayttı.
«Ne yazıq ki, 2014 senesinden soñ Qırım problemlerini al etmek ve, ilk evelâ, işğalni toqtata bilecek mehanizmlerni inkişaf ettirmek içün meydançıq ola bilecek bir qurulış olmadı. Şu sebepten de Qırım platformasını quramız. Bütün medeniy memleketler ve em Ukraina, em çeteldeki cemaat küçlerini Qırım içün birleştirmege yardım eter, dep tüşünemiz. Qırımtatar halqınıñ eşqına da. Meclis vekilleri bu işke qoşulır, dep ümüt etemiz. Bizim vazifemiz Qırımnı Ukraina devleti kontroline tez qaytaracaq çezimler olmalı», – dedi Zelenskıy.
O, «bu meselede Türkiyeniñ ciddiy rolü olacaq», dep qoştı.
«Bizim regionımızda Türkiyesiz çezilecek bir şey barmı? Yoq, ebet», – dep bildirdi Zelenskıy.
Qırım.Aqiqat, Qırımtatar Milliy Meclisiniñ reisi Refat Çubarovğa izaat bermesi içün muracaat etti.
Qırımnı işğalden qurtaruv halqara meydançığı – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiyeniñ onı halqara muzakerelerde kötermege niyeti yoq, dep qayd etken edi.
