Ukraina TİN yolbaşçısınıñ birinci muavini Emine Ceppar Poloniya Seyminiñ vitse-spikeri Malgojata Gösevskayağa Mustafa Cemilevniñ 2022 Nobel sulh mukâfatına namzet etip köstergeni içün minnetdarlıq bildirdi.
Bunı o Qırım.Aqiqatqa bildirdi.
"Poloniya Seyminiñ vitse-spikeri Malgojata Gösevskayağa Mustafa Cemilevniñ 2022 Nobel sulh mukâfatına namzet etip köstergeni içün pek minnetdarım, çünki Mustafa Cemilev böyle mukâfatqa lâyıqtır", - dedi Ceppar.
Ayrıca, o, Mustafa Cemilevniñ "halqınıñ aqları ve Qırımda yaşamaq aqqı içün küreştet asla qorqmağanını qayd etti.
Poloniya seymi qırımtatar halqınıñ lideri, Ukraina halq deputatı Mustafa Cemilevni 2022 senesi Nobel Barışıq Mukâfatına namzet kösterdi.
Poloniya aq qorçalayıcı Petr Hleboviç «Qırım haber agentligine» bildirgenine köre, Cemilev Seymniñ spiker muavini Malgojata Gosevskaya tarafından namzet kösterildi.
Mustafa Cemilev Nobel Barışıq Mukâfatına bundan evel de namzet kösterilgen edi.
Rusiye işğal etken Qırımda Mustafa Cemilevniñ mahkeme esnası devam ete.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi.
Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
