Çarşenbe künü, noyabrniñ 18-nde, Ukraina Tış işler naziriniñ birinci muavini Emine Ceppar, Belçika TİN siyasiy meseleler müdiri ve çoq taraflı işler Baş müdiri Aksel Kenes ile video körüşüv vaqtında Belçikanı “Qırım platforması” işinde iştirak etmege davet etti. Bu aqta Ukraina TİN matbuat hızmeti haber etti.
“Fırsattan faydalanıp, nazirniñ birinci muavini Belçikanı “Qırım platforması”nıñ azası olmağa davet etti ve 2021 senesi mezkür teşebbüsniñ tesis sammiti olacağını haber etti. O, Avropa ortaqlarnıñ, şu cümleden Belçikanıñ iştiragi müim olğanını qayd etti. Öz nevbetinde Aksel Kenes mezkür teşebbüske qoşulmağa davet içün minnetdarlıq bildirdi ve Ukrainanıñ Qırımnı işğalden azat etüvi ile bağlı mevamına deñişmez destegini bildirdi. O, bu mesele 2021 senesi BMT-niñ kün tertibinde olacağına inanğanını da ayttı”, – yazıla bildirmede.
Ceppar, Qırımda insan aqları bozuvları ile bağlı vaziyetni tefsir etip, Qara ve Azaq deñizleri ülkeleriniñ telükesizligi içün havflı olğan Ukraina yarımadasınıñ arbiyleştirilmesine de diqqat ayırdı.
Evel Emine Ceppar Avropa Birligi temsilcilerini "Qırım poatforması"n işnde iştirak etmege davet etti.
Kyivde 2021 senesi mayıs ayında Qırımnı işğalden qurtaruv halqara sammitini keçirmege planlaştıralar.
Berilgen malümatqa köre, Ukraina Kyivde «Qırım platforması» teşebbüsini muzakere etmek içün sammit ötkerecek ola. Bir çoq memleket, hususan Türkiye, ABD ve Baltiya memleketleri iştirak etmege meraqlı olğanını bildirdi, Kyiv Rusiyeni de muzakere masasına davet etmege niyetlene.
Qırımnı işğalden qurtaruv halqara meydançığı – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
