Babasınıñ "inançsızlığına" baqmadan, o, doktorlıq dissertatsiyasını qorçaladı, aqayınen beraber Azaq, Qara ve Hazar deñizlerine ekspeditsiyalarğa bardı, meraqları arasında atış ve paraşüt ile atlamalar bar edi. Bütün bular ayatiyatçı Zöre Ablâmitova aqqında. Dünya Qırımlı erkek alimleri aqqında bile: tilşınas Agatangel Krımskiy, filolog Basır Gafarov, virusolog Midat Selimov. Zöre Ablâmitovanıñ adı sıq rastkelmey. Amma o, özünden soñ 100-den ziyade ilmiy iş qaldırdı.
Zöre Ablâmitova Kefe civarındaki Qulçora (şimdiki Nekrasovka) köyünde doğdı. O, köylüler qorantasında doğdı. Zöreniñ babası 1938 senesi sovet akimiyeti tarafından basqılarğa oğratıldı ve lagerlerde vefat etti. Qız köy mektebini bitirip, balalıqtan oqumağa meraq köstere edi. O, tezce oquşqa ketmek istey edi ve bu sebepten vesiqalarında doğğan kününe bir yıl qoşqan edi. Ablâmitova 1917 senesi doğdı, amma bu sebepten bazı menbalarda onıñ doğğan yılı olaraq 1916 senesi qayd etile. Tek özü ögrenmek degil de, bilgilerini de paylaşmaq istegi onı Qırım pedagogika institutına alıp keldi. 1937 senesi "oca" zenaatını alğan Ablâmitova qırımtatar mektebinde ve Sudaqta orta mektepte himiya ocası olıp çalıştı. Amma, eñ çoq Zöreni ilim meraqlandıra edi.
1938 senesi Ablâmitovanı Qaradağ biostansiyasına çalışmağa davet ettiler. Deñiz uzviyetleriniñ biohimyasını tedqiq etti, Qara deñizdeki omurgasızlarnıñ himiyeviy terkibini talil etti, ve balıqlarnıñ qara cigerlerinde A vitaminini ögrendi.
Zöre qarşı KGB-ge çaqmalar yazıla edi, dep aytalar, o, babası sebebinden işançsız sayıla edi. Buña baqmadan, o, doktorlıq disertasiyasını qorçaladı ve biologik ilimler doktorı oldı. Qaradağ biostansiyasında o, kelecek aqayı Konstantin Vinogradov ile tanış oldı. O, belli sovet deñiz biologı ve ihtiolog edi. Nemse Almaniyası Qırımnı işğal etkende olar beraber Ufağa tahliye etildi.
Qaytqan soñ olar Qaradağ biostansiyasında çalışmağa devam ettiler ve "Mikluho-Maklay" gemisinde Azaq, Qara ve Hazar deñizlerinde ekspedisiyalarda iştirak ettiler.
Zöre Ablâmitova "Deñiz uzviyetleriniñ biohimiyası" işiniñ müellifi. 1967 senesi Kıyivde basılğan edi. Alimge ayrıca Qara deñiz balıqlarınıñ "tük taşlavı" adlandırılğan adiselerni açqanı da atfı etile. Em de deñiz uzviyetleriniñ ekologik biohimiyası biookeanografiyasında özgün ve prioritet yönelişniñ müellifi. Zöre Ablâmitova Odesağa 1950 seneleri köçti. Anda o, pensiyasına qadar Cenübiy deñizler biologiyası institutınıñ Odesa filialında (şimdiki Ukrayina Milliy ilimler akademiyasınıñ Deñiz biologiyası institutı) çalıştı.
Zöreniñ oğlu Aleksandr da alim-biolog oldı. "Deñiz biologı Konstantin Aleksandrovıç Vinogradov" adlı kitabında o, anasını hatırlay ve Zöre atışnen oğraşqanını ve birinci qırımtatar paraşütçisi olğanını yaza. Zöre Ablâmitova (Vinogradova) 1989 senesi quralaynıñ 18-nde vefat etti ve Odesada defn etildi. Özünden soñ Zöre 100-den ziyade ilmiy iş qaldırdı.
