Advokat Nikolay Polozov bildirdi ki, oktâbrniñ 7-nde yarımadaad ğıyabiy mahkemelengen Qırımtatar Milliy lideri Mustafa Cemilevniñ davası boyunca Ermeni Bazar mahkemesiniñ oturışı başqa künge qaldırıdı.
"Sebep, bugünki oturışta eşyaviy deliller ve şaatlarnıñ olmaması oldı. Mahkeme oturışnı başqa künge qaldırmağa qarar etti", - dedi Polozov.
Advokatnıñ qayd etkenine köre, mahkemege şaat rus sıñırcısı Konovalov kelmegen.
"O, mahkemeden evel tahqiqat vaqtında Mustafa Cemilevniñ sıñırdan keçmegenini bildirgen eki sıñırcıdan biridir. Amma soñra, olar şaatlar kibi sorğuğa çekilmediler. Al-azırda Konovalov Cenübiy Ösetiyada hızmet ete, anda Rusiye FSB-siniñ sıñır hızmeti bar eken. Yazıq ki, şaat Konovalov bugün kelmedi" - dep yazdı Polozov.
"Qırım boyunca İİN cevabında yazlğanı kibi, karabin, patronlar ve gilza olarda yoq eken. Krasnodar ülke mahkemesiniñ ükmüne binaen ise bu eşyaviy deliller olarda saqlı olmalı, - dedi advokat.
Advokat Nikolay Polozovnıñ haber etkenine köre, Qırımda Bağçasaray rayon iç işler bölügi Rusiye nezaretinde olğan Ermeni Bazar şeer mahkemesine Qırımda ğıyabiy şekilde mahkeme etilgen qırımtatar halqınıñ milliy lideri Mustafa Cemilevniñ davası boyunca silânıñ diqqatsız saqlap tutmasına dair «isbatlar» olmağanını bildirgen.
Avgustnıñ 5-nde mahkeme Qırımnıñ Rusiye iç işler nazirliginiñ sabıq yolbaşçısı Sergey Abisovnı (2014-2018) Qırımda ğıyabiy şekilde mahküm etilgen qırımtatar halqınıñ milliy lideri Mustafa Cemilevniñ davası boyunca sorğuğa çekmek içün tekrar celpname yollaycaq ola, dep bildirdi.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi.
Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
