Avgustnıñ 9-ında Ukraina prezidenti Volodımır Zelenskıynıñ qırımtatar liderlernen körüşüvinde qırımtatar muhtariyeti meselesi muzakere etile edi. Bunü Qırım.Aqiqatqa qırımtatarlarnıñ lideri Mustafa Cemilev aytıp berdi.
"Esasen Qırımdaki alnı, insan aqları vaziyetini, adamlarnıñ keyflerini muzakere ettik. Ekinci mesele - biz, Yuqarı Radada kecmek kerek, dep sayğanımız bütün qanun leyhalarını laf ettik. Eñ müim mesele - qırımtatar ve başqa tamır halqlarnıñ statusı aqqında Ukraina Anayasasına deñişmelerniñ kirsetüvidir", - dedi Cemilev.
Cemilev aytqanına köre, körüşüvde, şimdi böyle deñişmeler içün pek kelişikli şarait, çünki prezident partiyası parlamentte çoqluqnı aldı, dep aytıldı, buña cevap olaraq Zelenskiy "razı olıp, başını salladı".
Cemilev, bütun tilekler yazma şekilde Zelenkıyğa berilecegini qoştı.
Halqara Tamır halqlar kününde Ukraina prezidenti Volodımır Zelenskıy, qırımtatar halqnıñ vekillerinen - Meclis reisi Refat Çubarov ve qırımtatar milliy lideri Mustafa Cemilevnen körüşti.
Avgustnıñ 9-nda Halqara Tamır halqlar Künü qayd etile. Böyle bir kün BMT Baş Assambleyasınıñ rezolütsiyası ile 1994 senesi tayin etilgen edi.
2014 senesi martnıñ 20-nde Yuqarı Rada qırımtatarlarnı Qırımnıñ tamır halqı dep tanıdı. Bu qararğa 283 deputat qoltutqan edi. Ukraina tamır halq olğan qırımtatarları ve diger milliy azlıqlarnıñ etnik, medeniyet, til ve din hususiyetleriniñ saqlap qalması ve inkişafına kefil olacağını vade etti.
