Tünevin, Halqara Tamır halqlar kününde Ukraina prezidenti Volodımır Zelenskıy, qırımtatar halqnıñ vekillerinen - Meclis reisi Refat Çubarov ve qırımtatar milliy lideri Mustafa Cemilevnen körüşti.
Bu aqta Ukraina prezidenti Ofisiniñ saytında bildirile.
Beyanatqa köre, körüşüvniñ maqsadı - "Prezident Ofisi ve Meclis arası işbirlikniñ küçleştirüvi, ve yarımadanı işğalden qurtaruvı ve onı ğayrıdan integratsiyası içün areketlerniñ koordinatsiyası".
"Biz, daa yaqın tanışmaq içün, Qırım ve qırımtatarlarnıñ qorçalavınıñ esas meselelerini muzakere etmek içün toplaştıq. Qaysı areketlerni beraber yapmalımız, siziñ tarafıñızdan neler endi yapılğanını muzakere etmek içün", - dedi Volodımır Zelenskıy.
Bildirile ki, körüşüv azaları, ilhaq etilgen Qırımda ve Aqyarda insan aqları, hususan, siyasiy mabüslerniñ aq-uquqlarnıñ qoruvını da laf etti.
"Mustafa Cemilev ve Refat Çubarov, devlet başını işğal etilgen yarımadaki şimdiki vaziyet aqqında haberdar etti. Qırımtatarlarnıñ lideri, Qırımda tamır halqnı er türlü bastırmaq tırışqanlarına ayrı diqqat etti", - denile beyanatta.
Prezident ofisinde, Çubarov ve Cemilev, Qırımda insan aq-uquqlarınıñ bozuluvını tesbit etmek içün, dünyada yarımadada daimiy nezaret komissiyasını başlatmaq meselesini qoymağa teklif etti.
Avgustnıñ 9-nda Halqara Tamır halqlar Künü qayd etile. Böyle bir kün BMT Baş Assambleyasınıñ rezolütsiyası ile 1994 senesi tayin etilgen edi.
2014 senesi martnıñ 20-nde Yuqarı Rada qırımtatarlarnı Qırımnıñ tamır halqı dep tanıdı. Bu qararğa 283 deputat qoltutqan edi. Ukraina tamır halq olğan qırımtatarları ve diger milliy azlıqlarnıñ etnik, medeniyet, til ve din hususiyetleriniñ saqlap qalması ve inkişafına kefil olacağını vade etti.
