«Soñki malümatqa köre, şimdi Qırımda 288 siyasiy mabüs bar. Tahminen 65-70%-ı qırımtatarıdır. Biz bütün cebelerde çalışamız», – dedi o, Yesipenko ve diger siyasiy mabüslerniñ, mahküm etilgen qırımtatarlarnıñ azat etilüvi meselesi ne alda sualine cevap berip.
O, azat etüv esnasına Türkiyeniñ imkânları celp etile, amma bu «pek qıyın», dep qoştı.
«Hususan olar [Rusiye akimiyeti – QA] qırımtatarlarnı azat etmege istemeyler. Eger olarnı deñiştirseler, bu Qırımda qalğanlarnı faal küreşke ruhlandırır, dep tüşüneler. Bu olarnıñ pozitsiyasıdır», – dep qoştı Cemilev.
Türkiyeniñ Ukrayina ve Rusiye arasındaki barışıq muzakerelerinde iştirak etmesi aqqında Cemilev bir qaç afta evelsi Türkiye-Ukrayina parlament gruppasınıñ toplaşuvı olıp keçkenini ayttı.
«Biz fikrimizni bildirdik, topraqlar işğalden azat etilmese, barışıq teklifleri olmaz. Amma bilesiñizmi, olar buña biraz farqlı yanaşalar, amma biz öz pozitsiyamıznı açıq-aydın bildirdik. İşğal etilgen topraqlar bellisiz müddet işğal altında qalması şartınen kontakt liniyasında böyle ateşkes bizim içün qabul etilmez dedik», – dep qayd etti qırımtatar halqınıñ lideri.
Cemilev qayd etti ki, Türkiyeniñ Rusiye ile «öz siyaseti» ve büyük iqtisadiy bağları bar, amma qırımtatar halqınıñ lideri onıñ pozitsiyası içün, hususan memleketniñ prezidenti Recep Erdoğannıñ işğal etilgen topraqlar Ukratsinağa qaytarılmalı degen lafları içün teşekkür bildirdi.
Qırımtatar halqınıñ lideri Rusiyeniñ Ukrayinağa qarşı büyük ücüminiñ birinci künlerinde şimdiki Ukrayina Mudafaa naziri Rustem Umerovnen beraber Silâlı Quvetler içün kerekli silâ cedvelini alıp, Türkiyege ketkenlerini bildirdi.
«Anda 25-30-ğa yaqın madde bar edi, birinciden «Bayraktarlar», biz olarnı aldıq. Olar [Türkiye – QA] er vaqıt aytmañız dep rica etse de. Olar er vaqıt bizge yardım etmege isteyler, amma aynı vaqıtta, bu olarnıñ memleketine zarar ketirmesin isteyler», – qayd etti o.
Vladislav Yesipenko – ukrayin jurnalisti, Qırım.Aqiqatnıñ frilanseridir. Apiske alınğanına qadar içtimaiy ve ekologik meselelerni aydınlattı, qırımlılarnen soravlar keçirdi.
2021 senesi martnıñ 10-nda onı Aqmescitte tuttılar. Rusiye akimiyeti jurnalistni "Ukrayina mahsus hızmetleri menfaatında" malümat toplağanında ve maşnasında "öz başına yapılğan patlayıcı cihaz" saqlağanında qabaatladı.
Neticede Yesipenko 5 yıl umumiy rejimli koloniyada qalmasına ve 110 biñ ruble para cezasına mahküm etildi. Rusiye prokuraturası jurnalist içün 11 yıl apis cezasını istedi. Yesipenkonıñ özü, Rusiye quvetçileri onı işkencege oğratqanını, şu cümleden, tanımalarını istegenleri içün, elektriknen azaplağanını iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
