Qırımtatarlarnıñ milliy lideri, Ukraina halq deputatı Mustafa Cemilevniñ bildirgenine köre, qırımtatarlar yañı akimiyetke nisbeten muhalifette olğanına baqmadan, duşman degil ve «Avropa atlantik integratsiyasına taba ketmege» yardım etecek.
Bu aqta o, Ukraina prezidenti Volodımır Zelenskıynıñ «Halq hızmetçisi» firqasınıñ cedvelinde olmağanını izaatlap, Qırım.Aqiqat Radiosınıñ yayınında ayttı.
«Bu firqağa nisbeten allergiyamız yoq. Konstruktiv muhalifet aqqında desek, yañı prezidentniñ muvafaqiyetsizligine quvanmaycaqmız, dep ayttıq. Qırımnıñ işğalden qurtaruv yolu daimiy olsun dep, Avropa atlantik integratsiyasına taba ketmege yardım etmege tırışacaqmız. Buña er daim riayet etseler, biz muhalifet degil, ittifaqdaş olacaqmız», – dep ayttı Cemilev.
Onıñ bildirgenine köre, yaqında Meclis vekilleri Zelenskıynıñ taqımı ile körüşecek, ondan soñ vaziyet «daa belli olacaq».
«Zelenskıynıñ etrafında çeşit gruppalar bar. Bazıları qırımtatarlarsız olmaz, digerleri ise raqip olğanımıznı, aramızda umumiy bir şey olmağanını aytalar. Mence, yaqında körüşüvimiz olur ve er şey belli olacaq», – dep qayd etti Cemilev.
Daa evel Mustafa Cemilev Ukraina prezidenti namzeti Volodımır Zelenskıyge muracaat etip, işğal etilgen Qırımnen bağlı beş sual bergen edi. Zelenskıynıñ taqımı Cemilevniñ açıq muracaatına cevap berdi.
Bundan soñ Cemilev Zelenskıyden qırımtatar muhtariyetini tasdıqlaycaq Ukraina Anayasasınıñ deñişmelerinen bağlı tam cevap almağanını bildirdi.
Bu sene Ukraina akimiyeti saflarında qırımlılarnıñ taqımı quvetleşe bile. Olacaq parlament saylavlarında halq deputatlarınıñ mandatları içün küreşmek niyeti aqqında onğa yaqın qırımlı siyasetçi, memur ve cemaatçı namzetini kösterdi.
Ukraina Yuqarı Radasına firqa cedvelleri boyunca Qırımtatar Milliy Meclisiniñ beş vekili namzet kösterecek: qırımtatar halqınıñ lideri Mustafa Cemilev ve Meclis reisiniñ muavini Ahtem Çiygoz (Petro Poroşenkonıñ «Avropa birdemligi» firqası), Meclis reisi Refat Çubarov (İgor Smeşkonıñ «Küç ve namus» firqası), Gayana Yüksel (Ukrainanıñ yeşiller firqası), Qırımtatar Milliy Meclisiniñ azası ve Abmecit Suleymanov («Ukraina Halq Areketi»).
Yuqarı Rada saylavlarına tek Qırımtatar Milliy Meclisiniñ temsilcileri namzet köstermey. Olarnıñ arasında – ukrain jurnalisti ve qırımtatar asıllı devlet erbabı, Ukraina informatsion siyaseti naziriniñ birinci muavini Emine Ceppar («Ğroysmannıñ ukrain strategiyası» firqası), Qırımtatar Milliy Qurultayınıñ delegatı Rustem Umerov, «KrımSOS» teşebbüsiniñ koordinatorı Tamila Taşeva ve «VostokSOS» hayriye fondunıñ icra müdiri Aleksandra Dvoretskaya (üçü de Svâtoslav Vakarçuknıñ «Ses» firqasından), qırımlı bloger ve dizayner Liza Bogutskaya (Volodımır Zelenskıynıñ «Halq hızmetçisi» firqası), qırımlı, Ukrainanıñ sabıq halq deputatı Andrey Sençenko («Aq küçü»), cemaat faali, göñülli, Qırımdan köçken Natalya Lütikova («Ukraina Halq Areketi»).
