Qırımtatar halqınıñ lideri Mustafa Cemilev ve Qırımtatar Milliy Meclisiniñ reis muavini Ahtem Çiygoz Kanada parlamentiniñ tış işler ve halqara inkişafı daimiy komitetiniñ ilhaq etilgen Qırımda insan aqlarına riayet etüv vaziyetine bağışlanğan toplaşuvında çıqışta bulunacaqlar. Diñlevler cumaaqşamı künü, mayısnıñ 16-nda, Ottawada keçirilmeli. Bu aqta «Ukrinform» haber agentligi bildire.
Haber etilgenine köre, Cemilev ve Çiygoz Ottawada Dünya vışıvanka kününiñ şeñliklerine qoşulmağa ve Kanada memurlarınen eki taraflı körüşüvler keçirmege niyetlene.
Cumaertesi künü, mayısnıñ 18-nde, Cemilev ve Çiygoz Kanadanıñ Alberta vilâyetiniñ paytahtı Edmontonğa barıp, şeer yolbaşçılığı binası üzerinde qırımtatar bayrağını köterüv tedbirinde iştirak etecekler.
Qırımtatar halqı genotsidiniñ qurbanlarını añma kününe bağışlanğan tedbir saat 14:00-da başlanacaq.
Bayraq köterilgen soñ istegi olğan er kes Makiven universitetinde kösterilecek Ahtem Seitablayevniñ «Başqasınıñ duası» filmini baqa bile.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
