Qırımtatar halqınıñ lideri Mustafa Cemilev ve Meclis reisiniñ muavini Ahtem Çiygoz Kanadanıñ Alberta vilâyetiniñ paytahtı Edmontonnıñ şeer yolbaşçılığı üzerinde qırımtatar bayrağını köterüv merasiminde iştirak ettiler.
Bu aqta Kanadanıñ qırımtatar birliginiñ Facebook saifesinde mayısnıñ 19-nda haber etile.
Bayraqnı köterüv merasimine federal parlamentniñ deputatları Kerri Diotima ve Linda Dankan, Kanadadaki Ukrainalılar Kongressiniñ prezidenti Aleksandra Hiçiy, Ukrainanıñ Edmonton konsulı Aleksandr Danileyko ve Alberta ukrain cemiyetiniñ azaları qoşuldı.
1944 senesi qırımtatar halqı genotsidiniñ qurbanları añılıp, Makeven universitetinde Ahtem Seitablayevniñ «Başqasınıñ duası» filmi kösterildi.
Türkiyeniñ paytahtı Ankarada mayısnıñ 18-nde qırımtatar sürgünliginiñ 75 yılına bağışlanğan hatıra mitingi keçirildi.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
