Qırımtatar halqınıñ lideri, Ukraina halq deputatı Mustafa Cemilev, Qırım yürüşi kimniñ desteginen keçirilecegini Qırım.Aqiqat Radiosına tarif etti.
«Küçümizge işanamız. Yuqarı Radanıñ bir çoq deputatı olacaq, dep tüşünemiz. Eñ azından «Avropa birdemligi» olacaq. Elbette, Avropa parlamentiniñ deputatları, PACE deputatları, em de bir qaç ABD kongressmeniniñ diqqatını celp etmege ister edik», – dep bildirdi Cemilev.
Qırımtatarlarnıñ lideri aytqanına köre, yürüş Qırım ilhaqınıñ qanunsız olğanını bütün seviyelerde qabul etken halqara teşkilâtlarğa Rusiye qararlarından iç birisini yerine ketirmegenini köstermek içün yapıla.
«Böylece olarnı (halqara teşkilâtlarnıñ vekillerini – QA) vaziyetni körmeleri içün davet etemiz. Demek, bu memleketke qarşı sanktsiyalarnı quvetleştirmek kerek», – dedi Cemilev.
Qırımtatar Milliy Meclisiniñ reisi Refat Çubarov, yanvarniñ 27-nde Qırım yürüşini azırlaycaq ve keçirecek ştabnıñ ilk erkânı şekillendirildi, dep bildirdi. O, toplaşuv iştirakçileri bu aktsiyanıñ iştirakçileri Herson vilâyeti ve işğal etilgen Qırımnıñ memuriy sıñırından 2020 senesi mayısnıñ 3-nde keçecek dep qarar alğanını qayd etti.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Refat Çubarovnıñ aytqanına köre, yürüş teşkilâtçıları yapqan areketlerini Ukraina akimiyetinen keliştirmege «tırışacaq».
Yanvarniñ 22-nde Çubarov Qırım yürüşi mayısnıñ 2-nde keçirilecek, dep ayttı. Meclis reisi, işğal altındaki yarımadağa küç qullanıp kireceklerini de inkâr etmey.
Ukraina Devlet sıñır hızmetiniñ bildirgenine köre, keçirilüvi mayısnıñ 2-ne ilân etilgen Qırım yürüşiniñ iştirakçilerine mania olmaq içün sebep yoq.
Rusiye kontrolindeki Qırım yolbaşçısı Sergey Aksenov ilân etilgen yürüşni provokatsiya dep adlandırıp, «sert qarşılıq kösterilecegini» vade etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
