Türkiye Qırım ilhaqını iç bir vaqıt qabul etmeycek, dep Recep Tayyip Erdoğannıñ aytqanı, qırımtatarlar içün pek müim. Bu aqta Anadolu agentligine tefsir bererek, Ukraina prezidenti Volodımır Zelenskıynıñ Türkiye ziyaretine qoşulağan qırımtatarlarnıñ lideri Mustafa Cemilev ayttı.
Onıñ aytqanına köre, Qırım ilhaqı meselesi, Ukraina prezidentiniñ Türkiye ziyaretinde eñ müim meselelerinden birisi edi.
"Prezident Recep Tayyip Erdoğan, Türkiye iç bir vaqıt Qırım ilhaqını qabul etmez, Qırım - Ukraina toprağı, ve Türkiye daima qırımtatarlarnen beraber olacaq, dep ayytı. Bu sözler biz içün pek müim", - dedi Cemilev.
Oña köre, Qırım ilhaqından soñ, Ukrainada qırımtatarlarğa munasebet deñişti.
"Bizim tirençimiz, ilhaqnı tanımaqtan vazgeçkenimiz ve Ukraina tarafdarı olğanımız, ükümetke ve bütün ukrain cemiyetke büyük tesir etti. Ukrainada qırımtatarlarğa itibar pek arttı", - dedi qırımtatarlarnıñ lideri.
Qırımatatar milliy lideri, Ukraina halq mebusı Mustafa Cemilev, avgust 7-8-inde Ukraina prezidenti Volodımır Zelenskıynıñ Türkiye Cumhuriyeti ziyaretine qoşuldı.
