Qırımatatar milliy lideri, Ukraina halq mebusı Mustafa Cemilev, avgust 7-8-inde Ukraina prezidenti Volodımır Zelenskıynıñ Türkiye Cumhuriyeti ziyaretine qoşulacaq. Ziyaret devamında Türkiye prezidenti Recep Tayyip Erdoğannen, ukrain ve qırımatatar cemiyetlerinen körüşüvler keçirilecek ola, dep aytıp berdi Qırım.Aqiqatqa Cemilev.
"Körüşüv programmasını prezident ofisi azırlay, men sadece mevzularnı tevsiye ete bilem. Ortaqlıqnıñ ilerletüvini, memleketlerimiz arasında ticaretniñ arttıruluvını muzakere etecekmiz. Erdoğan Qırım ilhaqını qabul etmegeni içün minnetdarlıqnı bildirmek kerek. Belki de, Türkiye gemileri çeşit-türlü bayraqlarnı yaydırıp, (Qırım limanları ve suvlarına - QA) kirgenlerini muzakere etermiz", - dep qayd etti Cemilev.
Bundan ğayrı, o, Ukraina siyasiy mabüslerniñ meselesini ve olarnıñ Qırımda ve qomşu Rusiyede vaziyetini laf etmek kerek olğanını, qoştı, amma bu meselelerde Cemilev perspektivalarnı körmey.
"Putin tek deñişüvge razı ola bile, amma bizim deñiştirecegimiz az. Mında dünya cemiyetiniñ basqısı kerek", - dep qoştı o.
Zelenskıynıñ Türkiye ziyareti prezidentniñ resmiy saytında ilân etildi.
