Link açıqlığı

Saatnıñ esas haberi

«Cemilev davası»: Ermeni Bazar mahkemesi imaye şaatlarını sorğuğa çekip başladı


Mustafa Cemilev
Mustafa Cemilev

Rusiye kontrolindeki Ermeni Bazar şeer mahkemesinde Ermeni Bazarda ğıyabiy şekilde mahkeme etilgen qırımtatarlarnıñ milliy lideri Mustafa Cemilevniñ davası boyunca imaye şaatlarınıñ sorğusı başlandı. Sorğuğa çekilgen birinci insan Zair Smedlâ oldı, dep haber ete Qırım.Aqiqat mühbiri.

«O, (Smedlâ – QA) o künü Ermeni Bazarğa Mustafa Cemilevni qarşılamağa ketkenini ayttı. İşareti olmağan arbiy urbalı ve silâlı insanlar yolunı qapattı. Olar insanlarğa silâ doğurttı, birisi yolbaşçısına bile silâ doğurtqan eken. Şaat anda Mustafa Cemilevni qarşılağanını ve o, kiriş yasağı aqqında bir vesiqa ve malümat berilmedi dep aytqanını bildirdi», – dep tarif etti advokat Nikolay Polozov.

Bu davanıñ nevbetteki oturışuvı mayısnıñ 21-ne planlaştırıldı.

Rusiye FSBsiniñ baş idaresi, tahqiqat idaresine Ermeni Bazarda ğıyabiy şekilde mahkeme etilgen qırımtatarlarnıñ milliy lideri Mustafa Cemilevniñ davası boyunca Ukraina uquq qoruyıcılarına muracaat etmesini yasaqladı.

Ermeni Bazar mahkemesi imayeniñ talabınen FSB hadimini davet etmege razı oldı.

Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».

Hatırlatamız, qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.​

Mustafa Cemilev

Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.

Mustafa Cemilev 1991 senesi Qırımğa qaytıp oldı.

III-IX çağırılış Ukraina Yuqarı Radasınıñ halq deputatı ola.

Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.

2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.

XS
SM
MD
LG