Rusiye kontrolindeki Ermeni Bazar şeer mahkemesiniñ oturışuvında noyabrniñ 1-nde yarımadada ğıyabiy şekilde mahkeme etilgen qırımtatar halqınıñ milliy lideri Mustafa Cemilevniñ davası boyunca eşyaviy deliller tedqiq etildi, dep bildire Qırım.Aqiqat mühbiri.
«Hususan, Simonov karabinı, dört patron ve gilza tedqiq etildi. Deliller baqılğanda qutu bozulmadı. İmaye tarafı silâ parçalarını tedqiq etip, vatandaşlarda bulunması içün mania olğan qurşun ve gilza yerinde boya izleri yoq, dep qayd etti», – dep ayttı advokat Nikolay Polozov.
Onıñ bildirgenine köre, mahkeme oturışuvında şaat Dmitriy Konovalov sorğuğa çekildi, o, 2014 senesi mayıs ayında Qırımnıñ esas Ukraina ile memuriy sıñırı rayonında Ermeni Bazar yaqınlarında keçiş noqtasında hızmet etti.
«Bugün şaat Konovalovnı video konferentsiya bağı vastasınen Cenübiy Ösetiyadan sorğuğa çektik. Şaat keçiş noqtasında qara yolsuzlıq maşinasını ve andan çıqqan alçaqça boylu bir insannı kördi, dep ayttı. Bu insan Mustafa Cemilev edimi şaat aytıp olamadı. Soñra bu yolsuzlıq maşinası Herson vilâyeti tarafına ketti, dep ayttı. Yani maşina Ermeni Bazar şeerine taba keçiş noqtasınıñ sıñırından keçmedi», – dep tarif etti Polozov.
Oktâbr ayında Ermeni Bazarda «Cemilev davasınıñ» mahkeme oturışuvı eşyaviy deliller ve şaatlar olmağanı içün başqa künge qaldırılğan edi.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi.
Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
