Rusiye kontrolindeki Ermeni Bazar şeer mahkemesinde sentâbrniñ 11-inde qırımtatarlarnıñ milliy lideri Mustafa Cemilevge qarşı cinaiy dava çerçivesinde dörtünci oturışta daa eki şaatnı sorğuğa çekti. Onı ğıyabiy şekilde maküm eteler.
Qırım.Aqiqat mühbiri, birinci şaat Eldar Kubedinov, mahkeme taqiq etken adiseler vaqtında "bir çoq adamnen beraber, Ermeni Bazar yanında çolde turğan yol polisi noqtasınıñ ve vagonçıqlarnıñ yanında olğanını" ayttı.
Em de o anda "iç bir areket yapmağan arbiy urbalı adamlarnı" körgenini qoştı. Şaat, Cemilevni körgenini, amma "ondan uzaq turğanını ve onıñ aytqanını eşitmegenini" bildirdi. Kurbedinov onı da qayd etti ki, "Cemilev Ermeni Bazarğa taraf ketmege iç ıntılmadı".
Ekinci şaat - Sabri Yagyayev yalıñız Ukrainanıñ qıta qısmına adamlarnı taşığanını ve yolnı çoq adam qapatqanı içün maşnanı toqtatmağa mecbur olğanını ayttı. Şaatlarnıñ ekisi de mahkemede "Rusiye devlet sıñırınıñ mevcütligine dair iç bir alâmet körmegenlerini" ayttı.
Nevbetteki oturış sentâbrniñ 17-sinde olacaq.
Sentâbrniñ 10-nda bu dava çerçivesinde üçünci temel oturışuv olıp keçti.
Qırımda bir ay devam etken teneffüsten soñ «Mustafa Cemilevniñ davası» boyunca mahkeme esnası yañıdan başlay.
İyülniñ 30-nda Rusiye kontrolindeki Qırım Yuqarı mahkemesi Ermeni Bazardaki Rusiye mahkemesiniñ qırımtatarlarnıñ milliy lideri Mustafa Cemilevniñ sıñırlav tedbirini ğıyabiy şekilde uzatmaq qararına qarşı berilgen istinaf şikâyetini baqıp, onı qanaatlendirmedi.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Qırım ve Aqyardaki Rusiye Tahqiqat komiteti mayısnıñ 27-nde bu davanıñ tahqiqatını bitirdi.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
