Rusiye kontrolindeki Ermeni Bazar şeer mahkemesinde sentâbrniñ 10-nda yarımadada ğıyabiy şekilde mahküm etilgen qırımtatarlarnıñ milliy lideri Mustafa Cemilevge qarşı cinaiy dava çerçivesinde uyuçnci temel oturışuv olıp keçti.
Qırım.Aqiqat mühbiriniñ malümatına köre, oturışuvda şaat Mubein Nebiyev sorğuğa çekildi. O, mahkeme tahqiq etken adise-vaqialar vaqtında «Ermeni Bazar tışında Rusiye devlet sıñırını bozuv alâmetleri yoq edi» (Cemilevniñ 2014 mayısında Qırımğa Herson vilâyetinden kirüv ıntıluvı aytıla), dep qayd etti.
Şaatnıñ qayd etkenine köre, yolda tahminen biñ qırımtatarı toplaştı, amma olarnıñ tarafından «bir de bir agressiv niyet qayd etilmegen edi». Nebiyev, bu yerde haki renkinde urbağa kiyingen kimligi belli olmağan insanlar bar edi, dep ayttı. Yaqınlarda arbiy yük maşinalarını kördi, dep qayd etti.
Latınin soyadlı ekinci şaat oturışuvğa kelmedi, sebebini bildirmedi. Diger şaatlarnı çağırmaq içün oturışuv sentâbrniñ 11-ne qaldırıldı.
Qırımda bir ay devam etken teneffüsten soñ «Mustafa Cemilevniñ davası» boyunca mahkeme esnası yañıdan başlay.
İyülniñ 30-nda Rusiye kontrolindeki Qırım Yuqarı mahkemesi Ermeni Bazardaki Rusiye mahkemesiniñ qırımtatarlarnıñ milliy lideri Mustafa Cemilevniñ sıñırlav tedbirini ğıyabiy şekilde uzatmaq qararına qarşı berilgen istinaf şikâyetini baqıp, onı qanaatlendirmedi.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Qırım ve Aqyardaki Rusiye Tahqiqat komiteti mayısnıñ 27-nde bu davanıñ tahqiqatını bitirdi.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
