Rusiye kontrolindeki Ermeni Bazar şeer mahkemesinde qırımtatarlarnıñ milliy lideri Mustafa Cemilevge qarşı cinaiy davada şaat olğan İlmir İbadlayev, Ermeni Bazar kirişinde bilinmegen adamlar qırımtatarlarnıñ maşnalarını sopa ve armaturanen urdı, dep ayttı. Bunı Qırım.Aqiqat mühbiri bildirdi.
Şaatnıñ aytqanına köre, yol çetinde 30-40 adam tura edi ve Herson vilâyeti tarafından masnalar kelgende, bu adamlar yolğan çapıp çıqa edi. Maşnalar süratını azlaştıra edi ve bu arada adamlar olarnı sopa ve armaturanen ura edi. Böyle etip şaatnıñ kapot ve damı qırıldı.
Bundan ğayrı şaat, aynı yerde çölde eki avtomatçı yatqanını ayttı, olar Ermeni Bazarğa kirgen yolnı nişanğa alğan edi.
Bundan ğayrı İbadlayev Cemilevniñ bir yerde turıp Ermeni Bazarğa taraf ıntılmağanını körgenini qayd etti.
Bu dava boyunca nevbetteki oturış cuma künü, sentâbr 24-ünde olacaq.
Daa evel qabaatlav tarafınıñ şaatı olğan Yakub Süleymanov bazı öz şaatlıqlarını tasdıqlap olamadı. Hususan, o Mustafa Cemilevni kerçekten körmegenini añlattı, sadece nasıldır bıcaqlı qaravullarnı körgen eken.
Qırımda bir ay devam etken teneffüsten soñ «Mustafa Cemilevniñ davası» boyunca mahkeme esnası yañıdan başlay.
İyülniñ 30-nda Rusiye kontrolindeki Qırım Yuqarı mahkemesi Ermeni Bazardaki Rusiye mahkemesiniñ qırımtatarlarnıñ milliy lideri Mustafa Cemilevniñ sıñırlav tedbirini ğıyabiy şekilde uzatmaq qararına qarşı berilgen istinaf şikâyetini baqıp, onı qanaatlendirmedi.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Qırım ve Aqyardaki Rusiye Tahqiqat komiteti mayısnıñ 27-nde bu davanıñ tahqiqatını bitirdi.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
