Rusiye kontrolindeki Ermeni Bazar şeer mahkemesinde qırımtatarlarnıñ milliy lideri Mustafa Cemilevge qarşı cinaiy davada qabaatlav tarafınıñ şaatı olğan Yakub Süleymanov bazı öz şaatlıqlarını tasdıqlap olamadı. Hususan, o Mustafa Cemilevni kerçekten körmegenini añlattı, sadece nasıldır bıcaqlı qaravullarnı körgen, bildire Qırım.Aqiqat mühbiri.
Aynı zamanda, tahqiqatta sorğu vaqtında, şaat, Cemilevni adamlarğa taba ketkende körgenini iddia etti. Em de o, askerlerniñ yarıluvı olğanını nege esaslanıp añlağanını açıqlap olamadı. Bundan ğayrı, mahkemede şaatlıq etkende şaat, "Turetskiy val" postu aqqında bilgenini ve "Armânsk" kiriş-çıqış noqtasını körgenini red etti, amma bundan evel o olarnı tahqiqat vaqtında şaatlıq etkende aña edi.
"Turetskiy val" aqqında asıl birinci kere eşitem, belki, nasıldır bir hata oldı", - dedi şaat.
Qalğanından ise, Yakub Süleymanov taksi aydavcısı olıp çalışqanını añlattı, ve 2014-ünci sene mayıs 3-ünde adamlarnı Ermeni Bazarğa alıp ketkenini ve anda bir sürü adam körgenini ayttı. Bir arada Qırım tarafından maşnanı kamuflâjda olğan bilinmegen şahışlar toqtattı. Arbiy tehnika yolnı bağladı. O bir qaç saat yolda bekledi, ondan soñ askerler bir koridor tizdi ve ondan artqa yibere ediler.
Bu dava boyunca nevbetteki oturış cuma künü, sentâbr 18-inde olacaq.
Qırımda bir ay devam etken teneffüsten soñ «Mustafa Cemilevniñ davası» boyunca mahkeme esnası yañıdan başlay.
İyülniñ 30-nda Rusiye kontrolindeki Qırım Yuqarı mahkemesi Ermeni Bazardaki Rusiye mahkemesiniñ qırımtatarlarnıñ milliy lideri Mustafa Cemilevniñ sıñırlav tedbirini ğıyabiy şekilde uzatmaq qararına qarşı berilgen istinaf şikâyetini baqıp, onı qanaatlendirmedi.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Qırım ve Aqyardaki Rusiye Tahqiqat komiteti mayısnıñ 27-nde bu davanıñ tahqiqatını bitirdi.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
