Davanıñ şikâyet arizası baqılğan ilk künü Rusiye polis hadimleri Rusiye kontrolindeki Qırım Yuqarı mahkemesiniñ binası ögünde 13 insannı tuttı. Tutulğanlar arasında – Nariman Celâl ve ağa-qardaş Ahtemovlarnıñ soy-sopları ve «Qırım birdemligi» aq qorçalayıcı birleşmesiniñ eki jurnalisti. Rusiye kontrolindeki Aqmescitniñ Jeleznodorojnıy rayon mahkemesi vatandaş jurnalisti Kulamet İbraimovnı 5 künge apiske aldı, tutulğan daa üç kişige ise 12 biñ rubleden 15 biñ rublege qadar para cezasını berdi.
Aq qorçalayıcılar aytqanı kibi, siyasiy sebeplerden yedi yılğa azatlıqtan marum etilgen vatandaş jurnalisti İrına Danılovıç keçken afta Rusiyege etap etildi.
Bu adiseler aqqında alıp barıcı Sergey Mokruşin Qırım.Aqiqat Radiosınıñ yayınında «Gratı» mahkeme jurnalistikası neşiriniñ muarriri Anton Naumlük, advokat Nikolay Polozov ve ZMINA insan aqları merkeziniñ yolbaşçısı Tetâna Peçonçıknen laf etti.