Ukrayina Mudafaa nazirliginiñ Baş istihbarat idaresiniñ haber etkenine köre, martnıñ 20-nde aqşam saatlarında yüz bergen patlavlar neticesinde Rusiyeniñ "Kalibr NK" qanatlı raketaları yoq etilgen.
"Vaqtınca işğal etilgen Qırımnıñ şimalindeki Canköy qasabasında yüz bergen patlav neticesinde şu an demiryol ile naqil etilgen Rusiyeniñ "Kalibr NK" qanatlı raketaları yoq etildi. "Kalibr NK" Rusiye Qara deñiz flotunıñ gemilerinden uçurmalar içün raketalardır. Bu kibi silânıñ uçuş uzaqlığı yerdeki nişanlar içün 2500 biñ kilometrden çoqtır ve deñiz nişanları içün 375 kilometrdir. Gizli "pamuqlar" Rusiyeniñ silâdan arıtılmasını devam ete ve ukrayin yarımadasını işğalden azat etüvge azırlay", - dep yazıla bildirmede.
Rusiye arbiyleri bu malümatnı izaatlamadılar.
Martnıñ 20-nde aqşam işğal etilgen Qırımnıñ şimalinde Canköyde sesli patlavlar eşitildi. Bu aqta yerli sakinler Telegram kanallarında bildire.
Canköydeki patlavlar aqqında «Krımskiy veter» Telegram kanalınıñ oquyıcıları haber ete. Ava mudafaasınıñ işi ve tüşürilgen uçucısız aqqında «ÇP Severnıy Krım» Telegram kanalınıñ izatalarında yazalar. «Çat Tipiçnıy Canköy | Canköy» Telegram kanalında 10 patlav aqqında haber etile.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
