Canköyde martnıñ 20-nde aqşam sesli patlavlardan soñ 7-nci mektep civarlarında ışıqlar yoq, dep haber ete Rusiye ve Qırım Telegram kanalları.
«Ava mudafaasınıñ işi neticesinde Ukrayına Silâlı quvetlerine ait dronlardan biriniñ parçaları şahsiy sektorda tüşti, №7 mektebi yaqınlarında ışıq problemleri bar», – dep haber ete «Jest Krım» Telegram kanalı. Bu malümatnı Rusiye tarafdarı bloger Aleksandr Talipov da tasdıqladı.
Bundan ğayrı, Rusiyege qoltutqan Telegram kanalları parçalar Oktâbrskaya soqağındaki tükânğa tüşti, dep bildire.
Yerli sakinlerniñ aytqanına köre, şeerde uçucısızlarnıñ sesi eşitile, atış ve patlavlar eşitile.
Qırımnıñ Rusiye akimiyeti ve Rusiye Federatsiyasınıñ arbiyleri vaziyetni daa izaatlamay. Ukrayına arbiyleri de şimdilik bir izaat bermedi.
Martnıñ 20-nde aqşam işğal etilgen Qırımnıñ şimalinde Canköyde sesli patlavlar eşitildi. Bu aqta yerli sakinler Telegram kanallarında bildire.
Canköydeki patlavlar aqqında «Krımskiy veter» Telegram kanalınıñ oquyıcıları haber ete. Ava mudafaasınıñ işi ve tüşürilgen uçucısız aqqında «ÇP Severnıy Krım» Telegram kanalınıñ izatalarında yazalar. «Çat Tipiçnıy Canköy | Canköy» Telegram kanalında 10 patlav aqqında haber etile.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
