Bu aqta Kaşkanıñ advokatı Emil Kurbedinov «Qırım birdemligine» bildirdi.
Tutulğanlar eki ayğa apiske alındı. «10 yıl devamında faal, din adamları, vatandaş jurnalistleri siyasiy ve diniy sebeplerden taqip etile. «Hizb ut-Tahrir» davaları – şablondır. Bugün mahkemede FSB hadimleri böyle bir sıñırlav tedbiri belgilenmesini istedi, çünki müvekkillerimiz saqlana, şaatlarğa tesir ete bile eken... Aynı laflar. Bu yıllar devamında tutulğanlarda iç biriniñ terrorist olmağanından emin oldıq», – dep tarif etti Emil Kurbedinov.
O, apis cezasını şikâyet etmek içün üç kün bar, dep qoştı. Advokat Rusiye kontrolindeki Qırım Cumhuriyeti Yuqarı mahkemesine şikâyet arizasını yollaycaq.
Çarşenbe künü Aqmescitteki Rusiye mahkemesi Canköy rayonında tutulğan sabıq cami imamı Remzi Kurtnezirovnı ve Ali Mamutovnı apiske aldı. Kurtneziro ev apsine yollanıldı, Mamutov – SİZOğa.
Martnıñ 5-nde saba Qırımda qırımtatarlarnıñ evlerinde kütleviy tintüvler oldı. Bağçasarayda tahqiqat tedbirleri «Qırım birdemligi» faalleriniñ evlerinde, Canköy rayonında ise din adamlarınıñ evlerinde keçirildi. Tintüvler 10 qırımtatarınıñ evinde yapıldı. Episi «terror teşkilâtında» iştirak etkeninde qabaatlandı.
Neticede Rusiye kontrolindeki Aqmescitniñ Kiyev rayon mahkemesi qırımtatar faalleri ve vatandaş jurnalistileri Memet Lümanov, Aziz Azizov, Rustem Osmanov ve Mustafa Abduramanovnı 2024 senesi mayısnıñ 4-ne qadar SİZOda qaldırdı.
«KrımSOS» qayd etkenine köre, bu tintüvler işğalniñ 10 yılı devamında üçünci büyük dalğa oldı. Aq qorçalayıcı teşkilâtlar halqara toplulıqnı Qırımdaki tintüv ve tutuvlarğa cevap bermesine çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
