Teşkilâtnıñ talilcisi Yevğen Yaroşenko bildirgenine köre, böyle tintüvler yarım yılda bir kere ola. «Meselâ, keçken dalğa 2023 senesi avgustnıñ 24-nde, Ukrayına Mustaqilli Kününde oldı. Tahminlerge köre, FSB hadimlerine Rusiye Federatsiyası Ceza kodeksiniñ belli maddelerine köre tutuv planlarını bereler. Bu planlarnıñ yerine ketirilüvinen uquq qoruyıcılarnıñ karyerası bağlı», – dep qayd etti o.
KrımSOS qayd etkenine köre, bugünki künge qadar «Hizb ut-Tahrir» teşkilâtı ile alâqaları sebebinden 107 kişi taqip etildi.
«Bugün tutulğanlar apiske alınsa, bu cedvelge daa 10 kişi qoşulacaq. Bazıları işğalciler tarafından endi taqip etilgen edi – Rustem Osmanov ve Memet Lümanov», – dep qayd etti KrımSOS.
Eñ büyük tintüvlerni Rusiye uquq qoruyıcıları 2019 senesi martnıñ 27-nde keçirgen edi. 24 insannıñ evi tintildi. 2016 senesi fevralniñ 11-nde ise rusiyeliler 12 insannıñ evini tintti, 8-i azat etildi.
Martnıñ 5-nde saba Qırımda qırımtatarlarnıñ evlerinde kütleviy tintüvler oldı. Bağçasarayda tahqiqat tedbirleri «Qırım birdemligi» faalleriniñ evlerinde, Canköy rayonında ise din adamlarınıñ evlerinde keçirildi. Tintüvler 10 qırımtatarınıñ evinde yapıldı.
Tintüvlerden soñ FSB eñ az beş kişini tuttı, olarnıñ arasında sabıq imam Remzi Kurtnezirov bar. Kurtnezirov ekinci derece saqatıdır.
Rusiye uquq qoruyıcıları martnıñ 5-nde tutulğan qırımtatarlarnı terror teşkilâtında iştirak etkeninde qabaatladılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
