Link açıqlığı

Saatnıñ esas haberi

«Buçadaki cenk cinayetleri ve genotsid Rusiyege qarşı qoşma sanktsiyalar talap ete»: dünya Buçada olğan kütleviy öldürüvler aqqında


Buça soqağında qolları bağlı öldürilgen vatandaş, 2022 senesi aprelniñ 3-ü
Buça soqağında qolları bağlı öldürilgen vatandaş, 2022 senesi aprelniñ 3-ü

Rusiye quvetleriniñ Ukrainada barışıqsever ealige qarşı canavarlıq yapqanına dair deliller peyda olğan soñ halqara toplulıq şokta olğanını bildire, Moskva ise bu haberlerni «provokatsiya» dep adlandırdı, dep haber ete Azatlıq Radiosınıñ ukrain hızmeti.

«Rusiye ordusı tarafından öldürilgen, namusına keçilgen ve ağır yaralanğan Ukraina barışıqsever insanları aqqında haberler takbih etilmeli», – dep bildirdi Yañı Zelandiyanıñ baş naziri Casinda Ardern jurnalistlerge Vellingtonda aprelniñ 4-nde.

«Rusiye yapqanları içün bütün dünya ögünde cevap bermeli», – dep qoştı o. Onıñ qayd etkenine köre, onıñ ükümeti Ukrainağa Rusiye istilâsına qarşı küreşinde qoltutmaq içün qoşma tedbirlerni muzakere etecek.

Yaponiyanıñ baş naziri Fumio Kisida adiselerni «halqara uquqnıñ bozuluvı» dep adlandırdı.

Rusiye yapqanları içün bütün dünya ögünde cevap bermeli
Casinda Ardern

Beyanatlar Kyiv civarındaki Buçada yüzlernen barışıqsever insannıñ Rusiye ordusı tarafından soñki bir qaç afta içinde atıp öldürilgeni ve toplu mezarlarğa atılğanı ya da soqaqlarda qaldırılğanı aqqında haberlerden soñ oldı.

Berilgen malümatqa köre, qolları bağlı olğan vatandaşlarnıñ cesedleri ile fotoresimler insanlarnı şaşırttı, ve Rusiyege qarşı sanktsiyalarnı quvetleştirmege ve qabaatlılarnı cinaiy taqipke oğratuvğa çağıruvnıñ sebebi oldı.

Buça soqaqlarında öldürilgen insanlar. Foto 2022 senesi aprelniñ 3-nde çıqarıldı
Buça soqaqlarında öldürilgen insanlar. Foto 2022 senesi aprelniñ 3-nde çıqarıldı

Frenkistan prezidenti Emmanuel Makron radioda bergen intervyüsında aprelniñ 4-nde Rusiye ordusınıñ Buçada yapqan «cenk cinayetleriniñ» alâmetleri bar, dep bildirdi.

Buçada olğanlar yañı sanktsiyalarnı ve tam tedbir talap ete
Emmanuel Makron

«Buçada olğanlar yañı sanktsiyalarnı ve tam tedbir talap ete», – dedi Makron. O, qoşma sanktsiyalar Rusiyeniñ kömür ve cermay ihracınen bağlı olmalı, dep qoştı.

İspaniya baş naziri Pedro Sançes Rusiye ordusı Buçada «genotsid» yapacaq qadar ileri ketti, dep bildirdi.

«Bu cenk cinayetlerini yapqanlar cezasız qalmasın dep, elimizden kelgenini yapacaqmız», – dedi Sançes Madridde.

Rusiye Tış işler nazirliginiñ spikeri Mariya Zaharova aprelniñ 3-nde aqşam devlet televideniyesinde çıqışta bulunıp, qabaatlavlarnı «provokatsiya» dep adlandırdı. O, Amerika Birleşken Devletleri ve NATO Rusiyeniñ itibarını tüşürmek içün resimlerni «sımarladı», dep delilsiz ayttı.

«Bu beyanatlarnıñ maqaleler çıqqan ilk daqqalar yapılğanı bu ikâyeni kimler «sımarlağanından» iç şübhe doğurmay», – dedi Zaharova.

Rusiye Mudafaa nazirligi bir delil köstermeyip, Buça fotoresimleri «Kyiv rejiminiñ daa bir sanalaştırması» ola ve Rusiye ordusı şeerni martnıñ 30-ndan evel terk etti, dep bildirdi.

Kyiv civarındaki Buça soqaqlarında Rusiye ordusı tarafından öldürilgen insanlarnıñ cesedleri. Foto 2022 senesi aprelniñ 2-nde yapıldı
Kyiv civarındaki Buça soqaqlarında Rusiye ordusı tarafından öldürilgen insanlarnıñ cesedleri. Foto 2022 senesi aprelniñ 2-nde yapıldı

Moskva, BM Telükesizlik şurasından aprelniñ 4-nde toplaşıp, Buçada «Ukraina radikallarınıñ provokatsiyası» olaraq adlandırğanlarını muzakere etmege rica etti.

Rusiye Tahqiqat komiteti aprelniñ 4-nde bir beyanat aydınlatıp, Buçada Rusiye ordusınıñ areketleri aqqında «yalan malümatnıñ» tarqatıluvınen bağlı «tahqiqat» aqqında ilân etti.

«Cinaiy emirler içün cevap bermek»

Ukraina prezidenti Volodımır Zelenskıy Aprelniñ 3-nde çıqışta bulunıp, Rusiye ordusını şeerde «genotsid» yapqanında qabaatladı ve Kreml reberlerine arbiyleriniñ yapqanlarını körmeleri içün Buçağa kelmek kerekler, dep ayttı.

Böyle emirler. Böyle yerine ketirüv. Ve umumiy mesüliyet bar. Bu öldürüvler, bu işkenceler içün
Volodımır Zelenskıy

«Rusiye Federatsiyasınıñ reberleri emirleri nasıl yerine ketirilgenini körsin isteyim», – dedi Zelenskıy video muracaatında, ukrain tilinden rusçağa keçip.

«Böyle emirler. Böyle yerine ketirüv. Ve umumiy mesüliyet bar. Bu öldürüvler, bu işkenceler içün… Eñsege atuv içün», – dedi o.

O, Rusiye prezidenti Vladimir Putin ve onıñ arbiyleri ordularınıñ Ukrainada yapqanları içün cevap bermeli, dep ayttı.

«Qolları arqasında bağlanğan ve başsız insanlarnı tapqanda añlamayım», – dedi o, Kyivniñ şimaliy-ğarbinden 35 kilometrdeki Buça şeeriniñ soqaqlarında olğan cesedler aqqında.

Azatlıq Radiosınıñ Ukraina hızmetiniñ mühbiri aprelniñ 2-nde kiçik şeerniñ soqaqlarında vatandaşlarğa oşağan insanlarnıñ cesedlerini kördi. Tek bir yerde mühbir 10-ğa yaqın ceset kördi.

AP jurnalistleri Buçanıñ farqlı yerlerinde eñ az 21 insannıñ cesedlerini kördi. Doquz kişilik bir gruppanıñ cesedleri – episi adiy urbada – yerli sakinlerniñ aytqanına köre, Rusiye quvetleri baza olaraq qullanğan yer yaqınında yata edi. İnsanlar yaqından öldürilgenine oşay.

Ukraina akimiyeti eñ az 410 barışıqsever insannıñ cesedleri keçken aftağa qadar Rusiye arbiyleri tarafından kontrol etilgen Kyiv rayonında tapıldı, dep bildirdi.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net/. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Maqaleniñ aslı – ​Azatlıq Radiosınıñ saytında

XS
SM
MD
LG