Qırımlı advokat Emil Kurbedinov meslekdeşi Edem Semedlâyevniñ işğal mahkemesi tarafından tevqif etilmesini temyiz etecek ola. Bunı Kurbedinov mahkeme qararı çıqarılğan soñ bildirdi, Qırım.Aqiqat "Qırım birdemligine" atfı etip haber ete.
"Bu yalıñız Edem Semedlâyev içün protokol degil, bütün advokat cemiyeti içün protokoldır. Bu öyle bir mesaj ki, poliske kelgen er bir advokat polis hadimleriniñ menlikni aşalağan talabına oğray bile. Ve bu kibi qanunsız areketerge riayet etmekten red içün advokatqa qarşı protokol tizile ve o 12 kün apis cezasına mahküm etile bile. Elbette biz mahkemeniñ bu qararını temyiz etecekmiz. Üç künümiz bar. Bugün kiçik bir noqta qoyuldı ve biz bundan soñra da advokatlar çalışıp öz zenaat faaliyetini ömürge keçirip olması içün çalışacaqmız", - dep bildird Kurbedinov.
Noyabrniñ 11-nde Rusiye kontrolindeki Aqmescitniñ Kiyev rayon mahkemesi advokat Edem Semedlâyevni 12 künge apiske aldı ve Ekstremizm ile küreş merkeziniñ hadimlerinden biriniñ ögünde soyunmaqtan red etkeni içün 4 biñ ruble para cezasını berdi.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Aqmescitte Rusiye kontrolindeki Qırım garnizor arbiy mahkemesiniñ binası ögünde tutulğan qırımtatar faalleri, jurnalistler ve advokat yarımada regionlarınıñ farqlı vaqtınca tutuv izolâtorlarına ketirildi. Oktâbrniñ 26-nda mahkeme keçirilmesi planlaştırıla.
Qırımnıñ Rusiye quvet müessiseleri bu tutuvlarnı tefsir etmey.
«Krım SOS» cemaat teşkilâtı Aqmescitte qırımtatar faalleri tutulğanı sebebinden «Qırım platformasınıñ» işini faalleştirmege çağırdı.
Rusiye quvetçileriniñ oktâbrniñ 25-nde qırımtatar faallerine qarşı yapqan areketlerini takbih etken beyanat Ukraina prezidentiniñ Qırım Muhtar Cumhuriyetindeki Temsilciligi tarafından aydınlatıldı.
