Sabıq siyasiy mabüs, Qırım sakini Volodımır Baluh, "siyasiy mabüslerni azat etüv platformasını qurmaq" – bu "maneviy borc", çünki "bugünde tevqifli qalğanlar bar".
«Bügünde apishanelerde tutulğan adamlar bar. Biz azat etilgen soñ, devlet tarafından mahkümler içün belli bir adımlar yapılmadı. Bizim borcumız – siyasiy mabüslerniñ azat etilmesi içün bir platforma yaratmaq. Bizni azat etmek içün, reabilitatsiyamız içün ne qadar çoq insan ğayret etti, şimdi ise bir türlü adımlar yoq», – dedi Baluh Qırım.Aqiqatqa.
Onıñ fikrince, siyasiy baqışları içün apis yerleyerinde bulunğan "insanlarnıñ mevzusını" kerekli seviyege çıqarmalımız.
«Nafile olmaması pek müim. Rusiye apishanelerinde ve DNR zindanlarındaki siyasiy mabüslerniñ ağır vaziyeti al etilmesi maqsadınen bu platforma iç esnaslarğa tesirli olması içün mesleatlaşmalar, muzakereler keçirile. Azırlanamız ve ümüt etem ki, tezden neticeleri aqqında aytıp berecekmiz. Bizim faaliyetimiz is etilecek, dep inanam», – dep qayd etti sabıq siyasiy mabüs.
Evel, Qırımlı rejissör Oleg Sentsov, Kremlniñ eski reineleri siyasiy mabüslerni azat etüv platformasını qurmağa istey, dep bildirdi.
Advokat Nikolay Polozovnıñ Qırım.Aqiqatqa bildirgenine köre, Rusiyede ve işğali altındaki Qırımda tutulğan Ukraina vatandaşlarınıñ advokatları ve soy-sopları olarnı azat etüv esnasında bir ilerilev körmey. Polozovnıñ malümatına köre, al-azırda 130-dan çoq Ukraina vatandaşı Rusiyede ya da Qırımda tutula.
2020 senesi oktâbr ayında Kyivde «Er birini hatırlat» aktsiyası olıp keçti. İştirakçileri akimiyetke Rusiye apishanelerinde tutulğan ukrainalı mabüsler aqqında hatırlattı.
Самые важные объятия. Моменты из жизни крымских политузников и их семей (фотогалерея)
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.