Qırımlı rejisser Oleg Sentsov, Kremlniñ eski reineleri siyasiy mabüslerni azat etüv platformasını qurmağa istey, dep bildirdi. Bu aqta o, Facebookta yazdı.
«Vova Baluh endi özüne keldi, Saşa Şumkov da bizlernen beraber. Siyasiy mabüslerni azat etüv platformasını qurmaq içün qardaşlarımıznen körüştik. Lâqayt olmağan er kesni, cemaat teşkilâtlarını ve diger müessiselerni işbirligine davet etemiz. Tek beraber olıp, bütün ukrainalı esirlerni, reinelerni ve siyasiy mabüslerni apisten çıqarıp olurmız!», – dep yazdı Sentsov.
Advokat Nikolay Polozovnıñ Qırım.Aqiqatqa bildirgenine köre, Rusiyede ve işğali altındaki Qırımda tutulğan Ukraina vatandaşlarınıñ advokatları ve soy-sopları olarnı azat etüv esnasında bir ilerilev körmey. Polozovnıñ malümatına köre, al-azırda 130-dan çoq Ukraina vatandaşı Rusiyede ya da Qırımda tutula.
2020 senesi oktâbr ayında Kyivde «Er birini hatırlat» aktsiyası olıp keçti. İştirakçileri akimiyetke Rusiye apishanelerinde tutulğan ukrainalı mabüsler aqqında hatırlattı.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
