Oktâbrniñ 8-nde GLOBSEC halqara forumında «Taqip etilgen fotoressamlarnıñ obyektivinde işğal etilgen Qırım» fotoresimler sergisi açıldı. Anda Qırım.Aqiqat jurnalisti Taras İbragimov ve Qırım.Aqiqatnen işbirligi yapqan ukrainalı jurnalist Alina Smutkonıñ fotoresimleri taqdim etilgen.
Sergide Bağçasaraydaki ekinci «Hizb ut-Tahrir davası» mabüsiniñ ömür arqadaşı Mümine Saliyevanıñ da fotoresimleri mevcut.
Bu aqta Ukraina Tış işler naziriniñ birinci muavini Emine Ceppar Facebook saifesinde haber etti.
«Sergi GLOBSEC Telükesizlik meseleleri 15-inci halqara forumınıñ baş munaqaşa salonı yanında qoyuldı. Böylece, bu halqara tedbirniñ çoqusı iştirakçileri Rusiye propagandasınıñ hayaliy «resimleriniñ» tam tersi olğan Qırım aqiqatını köriç is ete bilecek», – dep yazdı Ceppar.
Onıñ qayd etkenine köre, sergi vatandaş fikrini qorçalağan ve Qırımdaki vaziyetni icatları vastasınen köstergen ukrainalı müellifniñ 15 fotoresiminden ibarettir.
«Şu sebepten de Rusiye işğalci akimiyeti tarafından taqip etile», – dep qoştı Ceppar.
Hatırlatamız, Qırım.Aqiqat ile işbirligi yapqan fotoressam Alina Smutkonıñ Rusiye işğal etken Qırımğa kirişi 2019 senesi yasaqlandı.
Yanvarniñ 18-nde Rusiye FSBsiniñ hadimleri jurnalist Taras İbragimovnıñ Rusiyege ve işğali altındaki Qırımğa kirişini 2054 senesi mayıs soñuna qadar yasaqladı. Ukraina prezidentiniñ Qırım Muhtar Cumhuriyetindeki temsilciligi bunı takbih etti. Ukraina aq qorçalayıcıları ise Qırımda jurnalist, bloger ve faallerge qarşı basqı toqtatılsın dep, halqara toplulıqnı Rusiyege qarşı basqını quvetleştirmelerine çağırdı.
