Qırım.Aqiqat ile işbirligi yapqan fotoressam Alina Smutkonıñ Rusiye işğal etken Qırımğa kirişi yasaq etildi. Bu aqta o, Qırım.Aqiqatqa tarif etti.
«Bugün «Rusiye milliy telükesizligi içün telükeli olğan» insanlar sırasına kirdim. Netice: Rusiyege, hususan Qırımğa, 2028 senesine qadar kirmem yasaq etile. Pek yazıq», – dep yazdı Smutko Facebook saifesinde.
Qırım.Aqiqat Smutkonıñ Qırımğa kirişi yasaq etilgenine dair Rusiye FSBsiniñ qarar kopiyasını aldı.
2018 senesi noyabr ayında Rusiye FSBsi ukrainalı jurnalist Olena Savçuknıñ Qırım ve qomşu Rusiyege kirişini 2028 senesine qadar yasaq etken edi. Onıñ aytqanına köre, kirişi Rusiyege kiriş ve çıqış tertibine dair Federal qanunnıñ 27-nci maddesi 1-inci qısmınıñ 1-inci noqtasına köre («Devletniñ mudafaa ya da telükesizlikni, ya da cemaat nizamı, ya da eali sağlığınıñ qorçalavını temin etüv») yasaqlandı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
