"Bogdannıñ areketi Qırımdaki bütün ukrayinlerniñ sesidir": Bogdan Zizanıñ narazılığı Ukrayina trenindeki vagonda tasvir etildi

Moskvanıñ nezaretinde olğan Kezvlev memuriyetiniñ binasınıñ fasadına mavı ve sarı boya tökken Kezlevli Bogdan Zizanıñ Rusiye akimiyeti tarafından taqip etilüv ikâyesi "Ukrzaliznıtsâ" şirketiniñ treniniñ vagonında tasvir etilgen Müessise ukrayin ressamları ile birlikte ukrayinlerniñ Rusiyeniñ büyük istilâsına qarşı tirenüvine bağışlağan "Ğalebege doğru tren" leyhasının amelge keçirdi. Qırım ve qırımlılarnıñ tirenüvi aqqında hatırlatqan tren Ukrayina boyunca qatnay.

"Ğalebege doğru tren" terkibinde ukrayin ressamları tarafından resimlerler yaraşlırılğan yedi yolcu vagonı. O, Kıyiv – Ujgorod marşrutı ile areket ete. Er bir vagon Rusiye tarafından işğal etilgen Ukrayina topraqlarına ve Rusiye ordusına qarşı tirenmege devam etken adamlarğa bağışlanğan.

"Ğalebege doğru tren" "Ukrzaliznıtsâ" müessisesi, "Gres Todorchuk" agentligi ve Katâ Teylor reberligi altında ukrayina ressamlarınıñ bütün partizanlar, demiryol hızmetiniñ hadimleri, ekimler, arbiyler ve vatandaşlarğa ortaq bir teşekkür leyhasıdır.

Vagonlarnıñ birinde Rusiyeniñ tecavuzına qarşı tirenüv misalleri arasında Rusiyeniñ Ukrayinağa qarşı büyük istilâsına narazılıq bildirip, dersiñ şeerniñ Rusiye memuriyetiniñ binasınıñ fasadına mavı ve sarı boya tökkeni ve onı yaqmağa tırışqanı içün dört aydır Aqmescit tahqiqat tevqifhanesinde tutulğan kezlevli Bogdan Zizanıñ ikâyesi taqdim etilgen.

"Rusiye Ukrayina ile tedaiylerni yoq etmege tırıştı. Beceremedi"

Bogdan Zizanıñ ikâyesini Qırım.Aqiqat evel aytıp bergen edi. O, mayıs ayında Kezlev memuriyetiniñ binasınıñ fasadında mavı ve sarı boya ve yanıcı qarışmanıñ izleri aşkâr etilgen zaman Rusiye quvetçileri tarafından yaqalandı.

Ertesi künü Qırım televizionı kezlevliniñ qırımlılar ögünde "tevbesini" kösterdi. Bu kibi videolar Rusiyeniñ Ukrayinağa qarşı büyük istilâsı başlanğandan berli Rusiye tarafdarı telegram kanalları ve haber vastalarında cenkke qarşı narazılıqlarğa açıq takbih kibi sıq-sıq rastkelinir.

Bogdan Zizanıñ yaqınları onıñ üzerinde bedeniy küç qullanğanına dair alemetlerni körip, onıñ iskencege ögratılması ihtimalınıñ olğanını bildirdiler.

Tutulğan soñ Bogdan Zizanı başta "Rusiye silâlı quvetlerini itibardan tüşürgeni" içün para cezasına mahküm ettiler, soñra tevqif ettiler. O vaqıttan berli o SİZO-da buluna.

Bu ikâye şimdi "Ğalebege doğru tren"niñ vagonında Qırımdaki "Altın qapı" üzerinde mavı ve sarı boya sıfatında taqdim etilgen.

"Sekizi yıl evelsi Rusiye Qırımnı işğal etti. O vaqıttan berli yarımadada er angi tirenüv ve ukrayin mizacları sert şekilde bastırıldı. Ukrayina ile bütün tedaiylerni yoq etmek içün. Ebediyen. Amma olmadı. 2022 senesi mayısnıñ 16-nda Kezlevde şeer memuriyetiniñ binası üzerine mavı ve sarı boya tekken ukrayinalı ressam Bogdan Zizanıñ narazılığınıñ süretleri ağda darqaldı. O, aynı kunb tevqif etildi. Şimdi o Aqmescit SİZO-sında buluna, tatası ve dostları onıñ azat etilmesi içün küreşeler. Bogdannıñ areketi Qırımdaki bütün ukrayinlerniñ sesidir", - dep haber eteler leyha müellifleri.

Bundan ğayrı olara Qırım qaramanlarınıñ video ikâyelerini köstermege vade eteler.

"Biz Bogdannıñ azat etilmesini tezleştire bilemiz"

Bogdannıñ eki doğmuş tatası Aleksandra Barkova onıñ azat etilmesi içün küreşe ve ukrayin cemiyetini onıñ aqqında unutmamağa çağıra. Onıñ fikrince, "Ğalebege doğru tren" vagonında qırımlınıñ ikâyesiniñ peyda olması Rusiye apsinden azat etilmesini tezleştire bile.

"Bu leyhanı pek begenem, çünki Bogdannıñ tevqif etilmesinden soñ bu eñ büyük aktsiya. Onıñ yardımınen Bogdannıñ ikâyesi ğayet keniş darqala bile. Bu tren artıq Ukrainya boyunca qatnay. Vagonda QR-kod bar ve er kes onıñ ikâyesini oquy bile. Eger biz onıñ aqqında unutmasaq ve er keske onıñ aqqında aytıp bersek azat etilmesini tezleştire bilemiz. Bogdannıñ ikâyesi Qırımnıñ Rusiye tarafından işğali başlanğandan berli qırımlılarnıñ tirenüviniñ eñ parlaq misallerinden biridir", - dedi Aleksandra Barkova Qırım.Aqiqatqa.

Yaqın vaqıtta "Ğalebege doğru tren" leyhasınıñ müellifleri Bogdan Ziza ve Qırımnıñ Rusiye işğaline qarşı tirenüviniñ diger temsilcileriniñ video ikâyelerini derc etmege vade eteler.

Al-azırda Bogdan Ziza SİZO-da buluna. Aleksandra Barkovanıñ sözlerine köre, o, Rusiye Ceza qanunnamesiniñ üç maddesine binaen qabaatlana. Qabaatlavlar arasında terrorcılıq da bar, bunıñ içün o 15 yıl apis cezasına mahküm etile bile.

Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.

Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.

Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.