BMT-de Ukrainanıñ daimiy vekilligi mayıs 30-ında ilhaq etilgen Qırımda qırımtatar faalleri Lütfiye Zudiyeva ve Mümine Saliyevanıñ tutılıp alınmasını tenqit ete ve olarnı acele azat etmege talap ete.
Bu hususta Ukrainanıñ BMT-de vekilliginiñ Twitter saifesinde bildirile.
“Bugün (mayıs 30 - QA) rusiye işğalci akimiyet Qırımda Lütfiye Zudiyevanı, qırımtatar cemaat imayecisini tutıp aldı. Bu - insan aqları hususında yarımadanıñ gettoğa çevirilmesine qarşı çıqqanlarnı sustırmaq içün nevbetteki ayıp arekettir”, - denile beyanatta.
Ukrain diplomatlar “Lütfiye ve qalğan tutılıp alınğan faallerni acele azat etmege talap ete”.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı.
Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.
Saat 18:00 itibaren Mümine Saliyeva Aqmescitteki Rusiye Ekstremizm ile küreş merkezinden yiberildi. Faalniñ aytqanına köre, oña qarşı Rusiye Memuriy cinayetler kodeksiniñ 20.3 maddesine istinaden – yasaqlanğan timsallerniñ numayışı – memuriy dava açıldı.
Al-azırda Qırım ve qomşu Rusiyeniñ müessiseleri bir de bir izaat bermediler
