Ukraina prezidenti Volodımır Zelenskıy BMT BA 76-ncı sessiyasınıñ prezidenti olğan Maldiv Tış işler naziri Abdulla Şahid ile körüşüv vaqtında, Rusiyeniñ Qırımnı arbiyleştirilmesiniñ qarşısınıñ alınması ve yarımadada insan aqlarınıñ qorunması şimdiki sessiyada prioritet olmalıdır, dep ayttı.
«Abdulla Şeyh ile körüşüv vaqtında, Ukrainanıñ işğal etilgen topraqlarında insan aqlarınıñ qorunması, Qırımnıñ arbiyleştirilmesiniñ toqtatılması ve Rusiyeniñ tecavuzına qarşı turuv BMT BA 76-ncı sessiyasınıñ prioriteti olmalıdır. Yaqın işbirlikni ve Ukraina başlatacaq muvafıq qararlarnıñ qabul etilmesini bekleymiz», – dep yazıla Zelenskıynıñ Twitter saifesinde.
Ukraina prezidenti Volodımır Zelenskıy BMT Baş kâtibi Antonio Guterres ile körüşüv vaqtında, Qırımda, Donbasta ve Rusiyede tevqif etilgen 450 ukrainniñ azat etilmesinde yardım etmesini istep cedvel berdi.
BMT Baş Assambleyası Donbas ve Qırım meseleleri çezilecek meydançıqlardan biri ola, dep tüşüne Ukraina prezidenti Volodımır Zelenskıy.
Ukraina Tış işler naziri Dmıtro Kuleba Volodımır Zelenskıynıñ BM Baş Assambleyasınıñ sessiyasında iştirak etmek içün ABDge kerçekleştirecek ziyareti vaqtında «bütün muzakerelerde Qırım qırmızı yip» olacaq, dep bildirgen edi.
BM Baş Assambleyası yetmiş altıncı sessiyasını sentâbrniñ 14-nde açtı. BM Baş Assambleyasınıñ umumiy munaqaşaları sentâbrniñ 21-nden sentâbrniñ 27-ne qadar keçirilecek.
Sentâbrniñ 9-nda BM Baş Assambleyası «Ukrainanıñ vaqtınca işğal etilgen topraqlarındaki vaziyet» maddesini saqlav qararına ve onı Baş Assambleyanıñ 76-ncı sessiyası kün tertibiniñ leyhasına kirsetüvge qoltuttı.
Sentâbrniñ 2-nde Birleşken Milletler, Baş kâtibi António Guterresniñ Qırım ve Aqyarda insan aqlarınıñ bozuluvına dair yañı maruzasını aydınlattı. Vesiqada qayd etilgenine köre, BM Baş kâtibiniñ maruzası 2020 senesi iyülniñ 1-nden 2021 senesi iyünniñ 30-na qadar müddetni qavrap ala ve «insan aqları ve halqara gumanitar uquq bozuluvlarını tarif ete».
